Аргентинанинг Буэнос-Айрес шаҳрида поездлар тўқнашиб кетди. Ретиро ҳудудидан Пилар муниципалитетига кетаётган йўловчи поезди темирйўлни таъмирлаш учун материаллар олиб кетаётган локомотивга бориб урилган.
Ҳодиса оқибатида камида 100 киши жароҳатланган, 30 киши касалхонага ётқизилган. Пойтахт расмийлари мўъжизавий тарзда қурбонлар йўқлигини маълум қилди.
Буэнос-Айрес маъмурияти раҳбари Хорхе Макрининг сўзларига кўра, 60 кишига ёрдам кўрсатилган. Шунингдек, у ярадорларни 40 дақиқада эвакуация қилиш мумкинлигини қўшимча қилди. Икки нафари вертолётда шифохонага етказилди.
Тўқнашув натижасида ёқилғи сизиб чиққан. Ҳодиса сабаблари аниқланмоқда.