Аргентина футбол ассоциацияси ва футболчилари жаримага тортилди

Аргентина футбол ассоциацияси ва футболчилари ЖЧ финалида Испания миллий жамоаси ўйинчиларига нисбатан қўпол ҳаракатлари учун жаримага тортилди — FIFA матбуот хизмати.

Аргентина терма жамоаси ярим ҳимоячиси Леандро Паредес 10 та ўйинга дисквалификация қилинди ва 90 минг доллар миқдорида жаримага тортилди. Ҳимоячи Науел Молина 7 та ўйинга дисквалификация қилиниб, 90 минг доллар жарима тўлаши белгиланди. Ярим ҳимоячи Тяго Алмада эса 1 та ўйинга дисквалификация қилинди ва 30 минг доллар жаримага тортилди.

Финалдан сўнг Паредес Испания терма жамоаси футболчилари билан жанжаллашиб қолган эди. У дастлаб ҳимоячи Эрик Гарсиянинг бўйнидан ушлаган, кейин эса ярим ҳимоячи Гавини итариб юборганди.

FIFA, шунингдек, Аргентина терма жамоаси бош мураббийи Роберто Аялага 30 минг доллар жарима солди ва уни 3 та ўйинга дисквалификация қилди. Худди шундай жазо Испания терма жамоаси ярим ҳимоячиси Гавига ҳам қўлланди.

Бундан ташқари FIFA Интизом кодексининг “Спорт тадбиридан спортга оид бўлмаган намойишлар учун фойдаланиш”, “Жамоанинг нотўғри хатти-ҳаракати”, “Камситиш ва ирқчиликка асосланган ҳақорат” ҳамда “Ўйинларда тартиб ва ​​хавфсизликни таъминлаш” бузилиши бандлари бўйича Аргентина футбол ассоциациясига нисбатан 321 000 АҚШ доллари миқдорида жарима белгиланди.