АҚШнинг нефть тарифлари: Европа ва Осиёга янги имкониятлар очмоқда

Трампнинг нефть тарифларидан Европа ва Осиё нефтни қайта ишлаш корхоналари манфаатдор бўлмоқда.

АҚШ президенти Доналд Трампнинг Канада ва Мексика нефть импортига қўйган савдо тарифлари Европа ва Осиё нефтни қайта ишлаш заводларига АҚШдаги рақибларига нисбатан рақобатбардош устунлик беради, деб таъкидлашди таҳлилчилар ва бозор иштирокчилари Reuters агентлигига.

Трамп шанба куни АҚШга кириб келаётган фентанил ва ноқонуний муҳожирлар туфайли юзага келган миллий фавқулодда вазиятни ҳал қилиш мақсадида сешанбадан бошлаб Канада ва Мексика импортига 25 фоиз, Хитойдан келадиган товарларга эса 10 фоиз тариф белгилади, деб маълум қилди Оқ уй вакиллари. Уларнинг айтишича, Канададан келтирилаётган энергия маҳсулотларига атиги 10 фоиз бож солинса, Мексикадан импорт қилинаётган энергия маҳсулотларидан тўлиқ 25 фоиз ундирилар экан.

Саноат манбалари таъкидлашича, АҚШ хом нефтини импорт қилишнинг икки асосий манбасига қўйилган тарифлар АҚШ нефтни қайта ишлаш заводларининг оптимал ишлаб чиқариш учун зарур бўлган оғирроқ навли хом ашё харажатларини оширади. Бу эса уларнинг даромадлилигини пасайтириб, ишлаб чиқаришни қисқартиришга мажбур қилиши мумкин.

"Умуман олганда, бу Европа нефтни қайта ишлаш корхоналари учун ижобий, аммо Европа истеъмолчилари учун шундай бўлмаслиги мумкин," деб қўшимча қилди у.

"АҚШнинг шимоли-шарқий қисми кўпроқ бензин импорт қилишга мажбур бўлгани сабабли, Европа корхоналарининг фойда маржаси ошиши мумкин," - деди брокерлик компанияси раҳбари. "Менимча, Европа ва Осиё нефтни қайта ишлаш корхоналари бу вазиятдан энг кўп фойда кўрадиганлар бўлади".

Next Barrel таҳлил фирмаси асосчиси Матиас Тогнининг айтишича, тарифлар таъсир остига тушган хом нефть сотувчиларини харидорларни топиш учун нархларни пасайтиришга мажбур қилиши мумкин. Унинг фикрича, Осиё нефтни қайта ишлаш корхоналари чегирмали Мексика ва Канада хом нефтини ўзлаштириш учун қулай вазиятда, бу эса уларнинг фойда маржасини ошириши мумкин.

Energy Aspects компаниясининг нефтни қайта ишлаш бўлими бошлиғи Ренди Хурбуруннинг таъкидлашича, Осиё нефтни қайта ишлаш корхоналари рақобатдош устунликка эга бўлиши мумкин, чунки улар оғир хом нефтни қайта ишлаш учун зарур ускуналарга эга ва айни пайтда ўз ишлаб чиқариш қувватларини оширмоқда.

Ўтган йилнинг май ойида ишга туширилган Канаданинг Trans Mountain қувурини кенгайтириш лойиҳаси натижасида энди бу қувур орқали Канада Тинч океани соҳилига кунига қўшимча 590 000 баррель хом нефть етказиб бериш имконияти пайдо бўлди.