АҚШнинг Эронни блокада қилиш бўйича янги стратегиясига қарши чиқаётган давлатларни маълум қилди

Туркия, Ироқ ва Покистон АҚШнинг Эронга нисбатан янги стратегияси ҳамда ушбу мамлакатнинг қуруқликдаги савдо йўлларини ёпиш режасига қарши чиқмоқда.

Бу ҳақда The New York Times нашри хабар бермоқда.

Нашрда таъкидланишича, АҚШнинг Эронни «иқтисодий яккалаш» кампаниясидаги биринчи қадам мамлакат портларини денгиз орқали блокада қилиш бўлган. Кейинчалик Вашингтон мамлакат ҳаво транспорти тармоғининг катта қисмини «ишдан чиқарган» санкцияларни жорий этди. Энди эса АҚШ қуруқликдаги савдо йўлларини нишонга олмоқда.

Музокаралар жараёнидан хабардор уч нафар ироқлик расмий ва бир нафар америкалик вакилнинг NYT нашрига маълум қилишича, бир неча ҳафта давомида АҚШ расмийлари Эронга қўшни давлатларни чегара ўтиш пунктларини ёпишга кўндиришга ҳаракат қилган.

Бироқ Эронга қўшни мамлакатлар Вашингтоннинг бу қарори уларга ҳам Теҳроннинг ўзи каби жиддий иқтисодий зарар етказиши мумкин, деб ҳисобламоқда.

7 ноябрь, шанба куни АҚШ ҳарбийлари ҳам мазкур кампанияга қўшилиб, «Темир дарвоза» (Iron Gate) номли тезкор гуруҳ ташкил этилганини эълон қилди.

Ҳарбийлар маълум қилишича, гуруҳ «Эроннинг қуруқликдаги чегаралари ва Каспий денгизи орқали замонавий қурол-яроғ тизимлари, икки мақсадда фойдаланиладиган технологиялар, санкциялар остидаги материаллар ва ноқонуний молиявий оқимлар ҳаракатининг олдини олиш» билан шуғулланади.

Бироқ NYT ёзишича, ушбу тезкор гуруҳ амалда қандай фаолият юритиши ҳозирча аниқ эмас.

Шу билан бирга, АҚШнинг мазкур қарори энг катта хавфни Эроннинг йирик савдо ҳамкорларидан бири бўлган Ироқ учун юзага келтирмоқда. Бағдод ҳокимияти ўзи тўлиқ назорат қила олмайдиган чегара ҳудудида тартибсизликлар келиб чиқишидан хавотирда.