АҚШда қатл ижроси амалга ошмади: маҳкума икки марта инъекциядан сўнг ҳушига келди

АҚШнинг Теннесси штатида ўлим жазосига ҳукм қилинган 50 ёшли Криста Пайк муваффақиятсиз қатл уринишидан сўнг яна ҳушига келди ва гапира олмоқда. Бу ҳақда унинг адвокатлари маълум қилди.

Адвокатларнинг сўзларига кўра, Пайк ҳозир ҳам интенсив терапия бўлимида даволанмоқда. Қўлларидаги оғир жароҳатлар сабабли у шифохонада ётоққа боғланган ҳолда қолмоқда. Унинг соғлиғи оғирлигича қолмоқда, тикланиш истиқболи эса ҳозирча ноаниқ.

Қатл 1 октябрь куни амалга оширилган. Пайкка пентобарбиталнинг икки дозаси юборилган, аммо дори унинг ўлимига олиб келмаган. Гувоҳларнинг айтишича, маҳкума инъекциядан кейин ҳам нафас олишда ва хуррак отишда давом этган.

Адвокатларга маслаҳат бераётган анестезиолог Жоэл Зивотнинг тахминига кўра, дори қон томирига тўлиқ тушмасдан, атрофдаги тўқималарга кириб кетган бўлиши мумкин. Такрорий уринишдан олдин тиббиёт ходимлари Пайкнинг чап қўлига етти марта игна санчишга мажбур бўлган.

Криста Пайк 1996 йилда 19 ёшли Коллин Слеммерни ўлдиргани учун ўлим жазосига ҳукм қилинган. Тергов маълумотларига кўра, жиноят 1995 йилда, Пайк 18 ёшда бўлганида содир этилган.