АҚШ ва Украина 10 йиллик хавфсизлик шартномаси тузди

АҚШ президенти Жо Байден ва Украина раҳбари Владимир Зеленский Италияда бўлиб ўтган G7 саммитида хавфсизлик бўйича 10 йиллик икки томонлама шартнома имзолади. Бу ҳақда Reuters хабар берди.

Томонлар бу шартномани Украинанинг НАТОга аъзо бўлиш йўлидаги “кўприк” сифатида кўрмоқда. “Икки томон ҳам хавфсизликни таъминлаш учун Украинага муҳим ҳарбий кучлар, мустаҳкам имкониятлар ва НАТО стандартларига жавоб берадиган мудофаа саноати базасига барқарор сармоя зарурлигини тан олади”, дейилади келишувда.

Бироқ бу АҚШ томонидан Украинани ҳимоя қилиш учун Америка ҳарбийларидан фойдаланиш мажбуриятларини ўз ичига олмайди. Унда Вашингтоннинг Киев олдидаги молиявий мажбуриятлари ҳам ўрин олмаган.

Украина ва бошқа давлатлар ўртасидаги хавфсизлик шартномалари

Япония ҳам G7 саммитида Украина билан хавфсизлик бўйича ўн йиллик шартнома тузди. Зеленскийнинг сўзларига кўра, Токио 2024 йилда Киевга 4,5 миллиард доллар ёрдам беради ва келишув амал қилиш муддати давомида Украинани қўллаб-қувватлашда давом этади.

“Гап хавфсизлик ва мудофаа, гуманитар ёрдам, техник ва молиявий ҳамкорлик ҳақида кетмоқда”, — дейди Зеленский.

Ўтган ойларда Украина дунёнинг ўндан ортиқ давлати билан шу каби хавфсизлик битимларини имзолаган. Уларга қуйидагилар киради: Германия, Буюк Британия, Франция, Канада, Италия, Нидерландия, Испания ва бошқалар.

АҚШ Украинага узоқ муддатли моддий ёрдам кўрсатиш, “таълим, консалтинг, разведка, хавфсизлик, мудофаа-саноат” ва бошқа соҳаларда кўмаклашиши кутилмоқда. Ҳужжатда Украинага қуролли ҳужум ёки таҳдид содир бўлган тақдирда, АҚШнинг юқори мартабали амалдорлари украиналик ҳамкасблари билан кейинги қадамлар ва мамлакатнинг мудофаа эҳтиёжларини аниқлаш учун 24 соат ичида учрашиши белгиланган.

G7 саммити 13–15 июнь кунлари Италияда бўлиб ўтади. Саммит давомида Украинага молиявий ёрдам кўрсатиш бўйича ҳам келишувларга эришилган. G7нинг барча давлатлари Ғарбда музлатилган Россия активларидан тушган даромаддан фойдаланиб, йил охиригача Украинага умумий қиймати 50 миллиард доллар миқдорида кредит беришга тайёрлигини тасдиқлаган.