АҚШ ва Исроил Эрон энергетика иншоотларига зарба беришга тайёргарлик кўрмоқда

АҚШ ва Исроил Эрондаги энергетика инфратузилмасини энг йирик бомбардимонлардан бирини режалаштирмоқда.

Бу ҳақда хабардор манбалар CBS Newsга таяниб маълум қилди.

Уларнинг сўзларига кўра, зарбалар шу ҳафта охири бошланиши мумкин. Исроилга хабар берилган ва у ўз ҳаракатларини АҚШ билан мувофиқлаштирмоқда. Бироқ, манбанинг таъкидлашича, АҚШ президенти Дональд Трамп ҳали зарбалар учун якуний тасдиқ бермаган.

Шу билан бирга, Исроил расмийси CBS Newsга "Исроил тўлиқ кўламли ҳарбий ҳаракатларни қайта бошлаш тўғрисидаги бирон бир қарордан хабардор эмас ва Исроилдан Эронга қарши бирон бир ҳарбий ҳаракатга қўшилиш сўралмаган" деб айтди.

Манбаларга кўра, ҳарбий зарба режаси жума куни Трамп ва маъмурият аъзолари ўртасида унинг Кэмп-Дэвиддаги қароргоҳида бўлиб ўтган учрашувда муҳокама қилинган. Президентнинг баъзи сиёсий ёрдамчилари қатъиян қарши чиқишган.

Журналистлар олдида Трамп шундай деди: "Биз уларга жуда қаттиқ зарба берамиз. Бир пайт улар: "Биз бунга энди чидай олмаймиз", дейишади".

Икки манбага кўра, зарбалар, эҳтимол, электр станциялари ва нефтни қайта ишлаш заводларини ўз ичига олган энергетика инфратузилмасини нишонга олади.

"Президент Трамп Вазирлар Маҳкамаси йиғилишида айтганидек, Қўшма Штатлар ғалаба қозонади ва Эрон унинг бошқаруви остида ядровий қуролга эга бўлмайди", деди Оқ уй матбуот котиби Кэролин Лэвитт телеканалга.

Шу билан бирга, Пентагон матбуот котиби Шон Парнелл CBS News телеканалига берган интервьюсида президент якуний қарор қабул қилмагунча, департамент нишонлар ҳақида изоҳ бермаслигини айтди.