АҚШ суди Трамп маъмуриятининг $1,8 миллиардлик жамғармасини тўхтатиб қўйди

Reutersнинг хабар беришича, АҚШ федерал суди президент Доналд Трампнинг ҳукумат томонидан амалга оширилган “сиёсий таъқиблар” қурбонларига товон тўлаш учун ташкил этилаётган қарийб 1,8 миллиард долларлик жамғарма фаолиятини вақтинча тўхтатди.

Виржиния штати Шарқий округи судяси Леони Бринкема чиқарган қарорга кўра, Трамп маъмуриятига жамғармани ташкил этиш ёки унинг ишини бошлаш бўйича ҳар қандай кейинги ҳаракатларни амалга ошириш тақиқланди. Ушбу қарор камида 12 июнгача амал қилади.

Адлия вазирлиги ўтган ҳафта Трампнинг солиқ декларациялари ошкор бўлиши юзасидан Солиқ хизматига (IRS) қарши даъвоси бўйича келишув доирасида “Ҳукумат томонидан таъқибларга қарши жамғарма” (Anti-Weaponization Fund) ташкил этилишини маълум қилган эди.

"1,776 миллиард долларлик ушбу жамғарма беш нафар аъзодан иборат комиссия назоратида бўлиши режалаштирилган. Жамғарма “сиёсий босим” ёки “қонун орқали таъқиб” қурбони бўлганини исботлай олган шахсларга компенсация тўлаши керак эди. Бу атамаларни Трамп ва унинг тарафдорлари ўзларига қарши олиб борилган терговлар ва жиноий ишларга нисбатан қўллаб келади", дейилади Reuters хабарида.

Суд қарори Democracy Forward ташкилоти томонидан берилган даъво асосида қабул қилинган. Ташкилот Трамп маъмурияти томонидан сиёсий рақиб сифатида нишонга олинган шахслар мазкур жамғарма маблағларидан фойдалана олмаслигини таъкидлаган.

Мазкур жамғарма ҳатто Трампнинг айрим республикачи тарафдорлари томонидан ҳам танқид қилинган. Улар 2021 йил 6 январда Капитолийга қилинган ҳужум иштирокчилари ҳам давлат маблағлари ҳисобидан товон олиши мумкинлигидан норози бўлган. Танқидчилар эса бу жамғармани Доналд Трампнинг сиёсий иттифоқчиларини рағбатлантириш учун мўлжалланган “махфий сармоя фонди” деб аташмоқда.