Америка Қўшма Штатлари томонидан терроризмга алоқадорликда айбланиб қидирувга берилган “Толибон” етакчилигидаги Афғонистон ҳукумати ички ишлар вазири Сиражуддин Ҳаққоний Абу-Дабига ташриф буюрди ва у ерда БАА президенти Шайх Муҳаммад бин Зоид Ол Наҳаён билан учрашди.
Амирликларнинг WАМ ахборот агентлиги хабарига кўра, давлат раҳбари Қаср аш-Шати саройида Ҳаққоний бошчилигидаги «Толибон» ҳаракати делегациясини қабул қилди. Учрашувда «томонлар икки давлат ўртасидаги ҳамкорликни мустаҳкамлаш ва ўзаро манфаатларни таъминлаш ва минтақавий барқарорликни таъминлаш мақсадида алоқаларни кенгайтириш йўлларини муҳокама қилдилар».
Амирлик ҳукумати ахборот агентлиги томонидан эълон қилинган фотосуратлардан бирида президентнинг Афғонистон делегацияси билан учрашгани акс этган, улар орасида разведка хизмати раҳбари ва “Толибон”нинг сиёсий қаноти аъзоси Абдул Ҳақ Восиқ ҳам бор.
Таниқли мужоҳид қўмондони Жалолиддин Ҳаққонийнинг ўғли Сиражуддин “Толибон”нинг Покистон-Aфғонистон чегарасидаги молиявий ҳамда ҳарбий активларини назорат қиладиган "Ҳаққоний тармоғи"ни бошқаради. Тахминларга кўра, Ҳаққоний 40-йилларнинг охири ёки 50-йилларнинг бошларида туғилган. АҚШ Давлат департаменти уни ўта хавфли халқаро террорчи деб тан олди ва унинг қаерда эканлиги ҳақидаги маълумот учун 10 миллион доллар мукофот таклиф қилди.
Бирлашган Араб Амирликлари "Толибон" билан алоқаларни, жумладан, иқтисодий алоқаларни давом эттирадиган кам сонли давлатлардан биридир.