АҚШ Конгрессига Россия билан “дизел битими”ни блокловчи қонун лойиҳаси киритилди

Конгресс Вакиллар палатасига “Россия нефти бўйича коррупциявий битимларни тақиқлаш тўғрисида”ги қонун лойиҳаси киритилди. У АҚШ президенти Доналд Трампнинг Россия дизел ёнилғисини харид қилиш ва импорт қилиш бўйича битимини блоклашга қаратилган. Бу ҳақда Вакиллар палатасининг Ташқи ишлар бўйича қўмитаси демократларининг сайтида хабар берилди.

Қонун лойиҳаси ҳаммуаллифлари орасида 16 нафар демократ ва бир нафар республикачи бор. Ҳужжатда АҚШ Молия вазирлиги томонидан берилган, Россия ёнилғиси билан битим тузишга рухсат берувчи бош лицензияларни бекор қилиш ва келажакда янги лицензиялар беришни тақиқлаш таклиф қилинмоқда. Ҳужжатда, шунингдек, Оқ уйни Россия энергетика секторига қарши санкциялар жорий этиш назарда тутилган.

"Қўшма Штатлар Кремлга босимни кучайтириши керак бўлган бир пайтда, Трамп Украинани қўллаб-қувватлаш ўрнига Путин билан тил бириктириб, шахсий манфаатлари йўлида битимлар тузмоқда. Бу АҚШ ҳимоя қиладиган барча тамойилларга зиддир. Конгресс ҳаракат қилиши керак", — деди қонун лойиҳасини тақдим этган демократлардан бири Грегори Микс.

9 октябр куни АҚШ президенти Доналд Трамп Россия президенти Владимир Путин билан телефон орқали мулоқот қилганди ва шундан сўнг Россия АҚШ ва жаҳон бозорига дизел ёнилғиси етказиб берадиган “дизел битими”ни эълон қилганди.