АПЛ клуби мухлисларига мурожаат қилди: Фаластинга қарши қўшиқни куйламаслик сўралди

«Вест Ҳэм» клуби мухлисларидан Фаластинга қарши мазмундаги қўшиқни бошқа куйламасликни сўради. Гап жамоанинг исроиллик футболчиси Манор Соломонга бағишланган қўшиқ ҳақида кетмоқда.

Мазкур қўшиқ Чемпионшипнинг дастлабки турида «Бёрнли»га қарши сафар учрашувида «Вест Ҳэм» мухлисларининг бир қисми томонидан куйланган. Ўйин 2:2 ҳисобида якунланган, ёзда «Тоттенҳэм»дан келиб қўшилган Соломон эса дебют учрашувида гол урган.

Қўшиқда Соломон ҳақида Фаластинга нисбатан нафрат мазмунидаги жумла ишлатилган. Учрашувдан кейин унинг видеолари ижтимоий тармоқларда тарқалиб, мухлисларнинг ўзи орасида ҳам танқидларга сабаб бўлди.

«Вест Ҳэм» расмий муносабатида ушбу қўшиқни "ҳақоратли ва бўлувчи" деб атади.

"Биз мухлисларимизни ўз клуби ва қизил-кўк либосдаги футболчиларни баланд овозда, фахр билан қўллаб-қувватлашга чақирамиз. Аммо бу ҳеч қачон мухлислар ўртасида бўлиниш келтириб чиқарадиган ёки кимнидир ҳақорат қиладиган тарзда бўлмаслиги керак", — дейилади клуб баёнотида.

Лондон клуби келиб чиқиши ва қарашларидан қатъи назар, ҳар бир мухлис футбол учрашувларига қўрқув, камситиш ёки ҳақоратга учраш хавфисиз ташриф буюра олиши кераклигини таъкидлади. Клуб тенглик, хилма-хиллик ва инклюзивлик тамойилларига содиқ қолишини ҳам билдирди.

«Вест Ҳэм»нинг исроиллик мухлислар гуруҳи Israeli Hammers ҳам клуб позициясини қўллаб-қувватлади. Гуруҳ футбол одамларни бирлаштириши кераклигини таъкидлаб, фаластинликларга ёки бошқа ҳар қандай гуруҳга нисбатан нафратни қўллаб-қувватламаслигини маълум қилди.

27 ёшли Манор Соломон «Вест Ҳэм»га шу ёзда «Тоттенҳэм»дан келиб қўшилди. У билан уч йиллик шартнома имзоланган.