Суперлигада бугун 18-тур якунланади: «Навбаҳор» — «Насаф» ва «Пахтакор» — «Сурхон»

Ўзбекистон Суперлигасида 21 август, жума куни 18-тур учрашувларига якун ясалади. Турнинг сўнгги кунида икки беллашув ўтказилиши режалаштирилган.

Дастлаб Наманганда «Навбаҳор» ўз майдонида Қаршининг «Насаф» клубини қабул қилади. ПФЛ тақвимига кўра, мазкур учрашув Тошкент вақти билан соат 19:00 да бошланади.

Куннинг иккинчи баҳсида эса «Пахтакор» «Сурхон»га қарши майдонга тушади. Тошкентликлар иштирокидаги беллашув соат 20:00 да старт олиши белгиланган.

18-тур 18 август куни «Бухоро» — «Нефтчи» учрашуви билан бошланган эди. Кейинги кунларда «Машъал» — «Андижон», ОКМК — «Динамо», «Бунёдкор» — «Қўқон-1912» ҳамда «Хоразм» — «Локомотив» баҳслари ўтказилди.

Айниқса, «Навбаҳор» — «Насаф» учрашуви турнинг марказий баҳсларидан бири сифатида эътибор марказида бўлиши кутилмоқда. Қаршиликлар 17-турда ўз майдонида «Пахтакор»га 1:2 ҳисобида мағлуб бўлган эди.

Бугунги икки учрашувдан сўнг Суперлигада 18-тур тўлиқ якунланади. 19-тур эса 22 август куни «Нефтчи» — «Сўғдиёна» баҳси билан старт олади.