Англиянинг нуфузли нашри "Челси"нинг украиналик футболчисидан узр сўради

Нуфузли "Goal" портали "Челси" футболчиси Михаил Мудрикдан узр сўради.

Сайт эълон қилган баёнот яқинда чоп этилган украиналик футболчининг 2028 йилги Олимпиадада атлет сифатида қатнашиши мумкинлиги ҳақидаги хабар билан боғлиқ. Мудрик бир муддат олдин допингга оид ижобий тест натижаси сабабли футболдан четлаштирилган эди.

"Биз тарқатилган маълумотнинг нотўғри эканлигини тан оламиз. Мудрик дисквалификация қилинмаган, балки вақтинча четлаштирилган, унинг допинг ишига оид якуний қарор ҳали қабул қилинмаган. Бундан ташқари, Мудрик Олимпиада югурувчи сифатида фаолият юритиш имкониятини кўриб чиқмаяпти. Нашр келтириб чиқарган ноқулайликлар ва зарар учун Мудрикдан узр сўраймиз. Мазкур мақола платформаларимиздан олиб ташланди" дея таъкидланди баёнотда.

Эслатиб ўтамиз, Михаил Мудрикнинг "Челси" билан амалдаги шартномаси 2031 йилнинг ярмигача мўлжалланган.