Ангела Меркел Европа Иттифоқи номидан Россия билан музокаралар олиб борувчи шахсга айланиши мумкин

Бу ҳақда Deutsche Welle хабар берди.

Сиёсатшунос Андреас Умланд нашрга берган интервюсида, агар Москва унинг номзодига рози бўлса, Меркел “жиддий фигура” бўла олишини таъкидлади.

"Бу яхши танлов бўлар эди. Албатта, собиқ канцлер Меркелга нисбатан Германиянинг ўзида ҳам, Украинада ҳам эътирозлар бор, бироқ у мутлақо бошқа салоҳиятдаги сиёсатчи", — деди сиёсатшунос.

Шу билан бирга, нашрнинг қайд этишича, Украинани қўллаб-қувватловчилар орасида собиқ канцлерга бўлган муносабат ноаниқлигича қолмоқда, чунки Меркел ўзининг кўмаги билан имзоланган Минск келишувларини танқид қилишдан бош тортиб келмоқда.

Аввалроқ Зеленский Меркелни танқид қилган ва уни Киев ҳамда Бучага келишга чақирган эди. Кенг кўламли уруш бошланганидан бери собиқ канцлер бирор марта ҳам Украинада бўлмади.

DW нашрига кўра, Путин томонидан номзоди илгари сурилган бошқа бир собиқ канцлер Шрёдернинг Москва билан музокараларда ЕИ вакили бўлиш учун ҳеч қандай имконияти йўқ.