Оксфорд университетида ўтказилган тадқиқотда коронавирусни аниқлашда ишлатиладиган ПЗР тести эски инфекциялардан қолган ўлик вирусни топиб, янглиш равишда мусбат натижа кўрсатиши мумкинлиги маълум бўлди.
Би-би-си хабарида айтилишича, бу ҳолат тест натижаси мусбат чиққан кишида аниқланган вирус юқумли бўлмаслиги мумкинлигини англатади.
Олимлар ушбу ҳолат ташхислар нотўғри қўйилиши ҳамда пандемиянинг аслига зид равишда хавфлироқ кўринишига олиб келишидан огоҳлантирмоқда.
Тестлар билан боғлиқ тадқиқот ўтказган профессор Карл Ҳенеган коронавирусни аниқлашда мусбат/манфий натижа олиш ўрнига вируснинг миқдорига қараб хулоса чиқариш керак деган фикрда.
ПЗР – полимер занжирли реакция усулини 1983 йилда америкалик олим Кэри Мюллис ўйлаб топган ва бунинг учун Нобел мукофотини олган. Айни пайтда ПЗР тести юқумли касалликларни аниқлашда кенг қўлланилади.
