Агар Москва тинчликка эришишни истамаса, Вашингтон ва Пекин уни бунга мажбур қила олади

Агар Москва тинчликка эришишни истамаса, Вашингтон ва Пекин уни бунга мажбур қила олади — Зеленский.

Украина президенти мамлакат Россия билан урушни дипломатия йўли билан якунлаши учун қўлидан келган барча чораларни кўраётганини айтди. Унинг сўзларига кўра, Украинанинг рақиблари ва ишончсиз манбаларга таянадиганларнинг асосий даъволаридан бири Украина уруш давом этишини хоҳлаётгани ҳақидаги миш-мишлардир.

Зеленский бу айбловларни изчил, асосли ва ишончли тарзда рад этиш кераклигини билдирди. У айнан Украина тинчликни хоҳлаётганини ва бирор кун ҳам бу урушни истамаётганини таъкидлади.

Украина етакчиси мамлакат дипломатия йўлида ишлаётганини ва ёрдам бера оладиган барча раҳбарлар Киев ҳар қандай мазмунли музокаралар форматига тайёр эканини билишини айтди. Унинг таъкидлашича, асосий муаммо Путиннинг мулоқотга тайёр эмаслигидадир.

"Дипломатик йўл пайдо бўлиши учун дунёнинг ҳеч бир пойтахтида бунга ғов бўлмаслиги керак. Агар Москва тинчликни истамаса, Вашингтон ва Пекин уни бунга мажбур қилиши мумкин", — деди Зеленский.

Шунингдек, у Россия “унчалик ҳисоблашгиси келмайдиган” Европа давлатларининг таъсирини ошириш учун барча имкониятлар ишга солинаётганини, натижада Россия Европани бошқа эътиборсиз қолдира олмайдиган бўлишини қўшимча қилди. Президент европалик ҳамкорлар билан хавфсизлик ва сиёсий соҳадаги ҳамкорликнинг асосий вазифаларидан бири ҳам айнан шундан иборат эканини айтди.