Афғонистон Транспорт вазирлиги бешта қўшни мамлакатда транспорт маслаҳатчиларини тайинлади

Afghanistan Республикаси Транспорт вазирлиги Тожикистон, Ўзбекистон, Эрон, Покистон ва Туркманистонда транспорт маслаҳатчилари тайинланганини маълум қилди, деб хабар бермоқда IRAF ахборот агентлиги.

Вазирлик баёнотида таъкидланишича, ташқи савдода қўшни мамлакатларнинг қуруқлик орқали йўлларига кучли боғлиқ бўлган Афғонистон учун минтақавий ҳамкорликни ривожлантириш ва савдо коридорларини кенгайтириш жуда муҳим аҳамиятга эга. Бу орқали афғон тадбиркорлари жаҳон бозорларига чиқиш имкониятига эга бўлади.

«Тайинланган маслаҳатчиларнинг асосий вазифаси – экспорт ўсишига кўмаклашиш, транзит жараёнларини соддалаштириш ва мамлакатнинг транспорт имкониятларини кенгайтиришдан иборат», – дейилади вазирлик хабарида.

Маълумот учун, юқорида зикр этилган мамлакатлар, жумладан Тожикистон, ҳозирча талиблар ҳукуматига нисбатан де-юре расмий тан олишни амалга оширмаган. Шу билан бирга, Хитой, БАА, Ўзбекистон ва Покистон сингари айрим давлатлар Қобулда элчихоналар очган ёки дипломатларини аккредитация қилган. Бироқ ҳозирча талиблар ҳукумати халқаро миқёсда расман тан олинмаган.

БМТ ва кўплаб мамлакатлар Талибон ҳаракатини ҳозирда Афғонистондаги де-факто ҳокимият деб ҳисоблаётган бўлса-да, унинг легитим (қонуний) мақомини тан олмаган.