30 ёшдан ошган футболчилар орасидаги энг қиммат трансферлар: Роналду рекорди ҳамон янгиланмади

Футбол тарихида 30 ёш ва ундан катта футболчилар иштирокида амалга оширилган энг қиммат трансферлар рейтинги тақдим этилди. Рўйхатда Криштиану Роналду ҳамон яққол етакчилик қилмоқда.

Transfermarkt маълумотлари асосида тузилган рейтингга кўра, Роналдунинг 2018 йилда «Реал»дан «Ювентус»га 117 млн евро эвазига ўтиши 30+ ёш тоифасидаги футболчилар учун рекорд трансфер бўлиб қолмоқда.

Иккинчи ўринни Харри Кейн эгаллаган. Англиялик ҳужумчининг 2023 йилда «Тоттенҳэм»дан «Бавария»га кўчиб ўтиши 95 млн еврога баҳоланган.

Кучли учликни Неймар якунлайди. Бразилиялик футболчининг «ПСЖ»дан «Ал-Ҳилол»га трансфери 90 млн еврони ташкил қилган.

Рейтингнинг энг юқори ўринларидан янги трансфер ҳам жой олди. «Барселона» Родрини «Манчестер Сити»дан 60 млн еврога харид қилган ва испаниялик ярим ҳимоячи бу кўрсаткич билан рўйхатда бешинчи бўлди.

30 ёшдан ошган футболчиларнинг энг қиммат трансферлари:

1. Криштиану Роналду — «Реал» → «Ювентус» — 117 млн евро
2. Харри Кейн — «Тоттенҳэм» → «Бавария» — 95 млн евро
3. Неймар — «ПСЖ» → «Ал-Ҳилол» — 90 млн евро
4. Каземиро — «Реал» → «Манчестер Юнайтед» — 70 млн евро
5. Родри — «Манчестер Сити» → «Барселона» — 60 млн евро
6. Миралем Пьянич — «Ювентус» → «Барселона» — 60 млн евро
7. Роберт Левандовски — «Бавария» → «Барселона» — 45 млн евро
8. Марко Верратти — «ПСЖ» → «Ал-Араби» — 45 млн евро
9. Паулиньо — «Барселона» → «Гуанчжоу Эвергранд» — 42 млн евро
10. Леонардо Бонуччи — «Ювентус» → «Милан» — 42 млн евро

Эътиборлиси, кучли ўнликда «Барселона» иштирокидаги тўртта трансфер бор. Каталонияликлар Родри, Пьянич ва Левандовскини 30 ёшдан ошганидан кейин харид қилган, Паулиньони эса Хитой клубига сотган.

Шу билан бирга, Роналдунинг қарийб саккиз йил аввал ўрнатган рекорди ҳанузгача янгилангани йўқ. Унинг 117 млн евролик кўрсаткичи иккинчи ўриндаги Кейн трансферидан 22 млн еврога қиммат.