2011 йилда Сурияга нисбатан жорий қилинган иқтисодий санкциялар бекор қилинди

Европа Иттифоқининг ташқи ишлар ва хавфсизлик сиёсати бўйича олий вакили Кайя Каллас Сурияга қарши иқтисодий санкцияларни бекор қилиш тўғрисидаги қарорини эълон қилди, дея хабар беради Аnadolu агентлиги.

— Бугун биз Сурияга қарши иқтисодий санкцияларни бекор қилишга қарор қилдик. Биз Сурия халқига янги, инклюзив ва тинч Сурия қуришда ёрдам бермоқчимиз. Европа Иттифоқи Сурия халқини қўллаб-қувватлашда давом этади, — деди Каллас Брюсселда Европа Иттифоқи ташқи ишлар вазирларининг йиғилишидан сўнг ижтимоий тармоқдаги саҳифасида.

Европа Иттифоқи Сурияга қарши санкцияларни 2011 йилнинг май ойида, мамлакатда фуқаролар уруши бошланганидан кейин киритган эди.

Ушбу чекловларга қуйидагилар киради:

• Жисмоний шахсларга қарши чоралар: саёҳатни тақиқлаш, активларни музлатиш. Бу чоралар режимга алоқадор ва инсон ҳуқуқларини поймол қилишда иштирок этган деб ҳисобланган шахсларга нисбатан қўлланилган. Улар орасида Башар Асаднинг шериклари ва вазирлари бор.
• Соҳавий санкциялар: хом нефть ва нефть маҳсулотларини импорт қилишни тақиқлаш, икки томонлама (ҳарбий ва фуқаролик) товарларни экспорт қилишни чеклаш, айрим алоқа воситалари ва инфратузилма лойиҳаларини молиялаштиришни чеклаш.

2025 йилнинг 24 февралида, режим қулагандан сўнг, Европа Иттифоқи санкцияларни босқичма-босқич бекор қилиш бўйича биринчи қарорини қабул қилди. Ушбу қарор банк, энергетика ва транспорт соҳаларини қамраб олди.

Европа Иттифоқи вакиллари санкцияларнинг бекор қилиниши орқага қайтариладиган жараён эканлигини ва Суриядаги вазият қаттиқ назорат остида эканини таъкидлади.