1300 дан ортиқ исроиллик Ал-Ақсо масжиди ҳудудига кирди

Шарқий Қуддусдаги Ал-Ақсо масжиди ҳудудига 30 сентябрь куни эрталаб 1300 дан ортиқ исроиллик кирди.

Қуддус Ислом вақфлари бошқармаси маълумотига кўра, жами 1317 киши Исроил полицияси кузатуви остида мажмуа ҳудудига кирган. Ҳодиса яҳудийларнинг Суккот байрами кунларига тўғри келган.

Бошқарманинг исмини ошкор қилмаган вакили айрим ташриф буюрувчилар ҳудудда диний маросимлар ва ибодатлар ўтказгани, қўшиқ айтгани ҳамда рақсга тушганини билдирган. Унинг баҳосига кўра, бу ҳаракатлар Ал-Ақсода амал қилиб келаётган тарихий статус-квога зид.

Ал-Ақсо мусулмонлар учун муқаддас масканлардан бири ҳисобланади. Яҳудийлар эса ушбу ҳудудни "Маъбад тоғ" деб атайди ва уни ҳам муқаддас жой сифатида қабул қилади. Суккот кунларида мазкур ҳудудга исроилликларнинг кириши кўпайгани ҳақида Қуддус Ислом вақфлари бошқармаси аввалги кунларда ҳам маълум қилган.