Оқ уйнинг янги матбуот котиби ўз турмуш ўртоғи Трамп билан адаштириб юборди

Оқ уйнинг янги матбуот котиби Кэйти Закария иш фаолиятининг илк кунида ўз турмуш ўртоғи ва АҚШ президентини адаштириб юборди.

Бу ҳақда "РИА Новости" ёзмоқда.

Брифингда Закариядан тиғиз иш графигини фарзанд тарбияси билан қандай уйғунлаштиришга тайёрланаётгани ҳақида сўрашди. У оила ўзи учун асосий устувор вазифа бўлиб қолишини таъкидлади.

"Менинг президентим… Кечирасиз, менинг эрим. Яхши чиқди лекин. У залда қаердадир ўтирибди", — деди Закария ва ўз янглишиши устидан ўзи ҳам кулди.

Матбуот котибининг сўзларига кўра, унинг турмуш ўртоғи Калифорниядан учиб келган. Закария унинг оиласи яқин орада Вашингтонга кўчиб ўтишни режалаштираётганини қўшимча қилди. У кинопродюсер Тайлер Закария билан турмуш қурган. Эр-хотиннинг тўрт нафар фарзанди бор: 6 ёшдан 12 ёшгача бўлган уч ўғил ва бир қиз.

АҚШ президенти Дональд Трамп Кэйти Закариянинг Оқ уй матбуот котиби этиб тайинланганини 10 октябрь куни маълум қилган эди. Ундан олдин ушбу лавозимда ишлаган Кэролайн Левитт иккинчи фарзанди дунёга келгани ва оиласига кўпроқ вақт ажратиш истаги туфайли ўз постини тарк этган.