Италия аэропортида Европадаги энг йирик қуёш электр станцияси ўрнатилди

Станция Рим-Фьюмичино аэропортидан карбонат ангидрид гази чиқиндиларини йилига 11 минг тоннадан кўпроққа камайтиради, дея хабар беради Euronews.

Аэропорт - нафақат ҳаво транспортини амалга ошириш ва унга хизмат кўрсатиш мажмуасидир. Италияда исботланганидек, аэропортлар қуёш панелларини ўрнатиш учун идеал жой бўлиши мумкин.

Рим Фьюмичино халқаро аэропорти яқинда ўзининг янги қуёш фермасини тақдим этди. У №3 учиш-қўниш йўлагининг шарқий қисмида жойлашган. Эллик беш минг панель Европадаги энг катта фотоэлектр тизимни ташкил қилади.

Станция Италия энергетика вазири иштирокида очилди. Ушбу лойиҳа туфайли аэропортнинг ишлаши давомида ажралиб чиқадиган карбонат ангидрид ҳар йили 11 минг тоннадан кўпроққа камаяди.

Шу каби лойиҳалар учун аэропортлардан ташқари кўплаб ҳудудлардан фойдаланиш мумкин.

Авиация транспорт соҳасида иссиқхона газлари чиқиндиларининг иккинчи йирик манбасидир. Қайта тикланадиган энергия лойиҳалари учун ўз асосларидан фойдаланган ҳолда, аэропортлар қазиб олинадиган ёқилғига қарамликни камайтириш ва «яшил энергия»га ўтишга ҳисса қўшишда муҳим роль ўйнаши мумкин.