Rossiya va Ukrainaning bir-birining energetika infratuzilmasi ob’ektlariga zarba berishdan tiyilishi urushning qizg‘in fazasini yakunlash yo‘lidagi birinchi qadam bo‘lishi mumkin, dedi Ukraina prezidenti Vladimir Zelenskiy Financial Times nashriga bergan intervyusida.
"Energetika xavfsizligi bo‘yicha qaror qabul qilinishi mumkin. Boshqacha aytganda, biz ularning energetika infratuzilmasi ob’ektlariga hujum qilmaymiz, ular biznikilarga hujum qilmaydi. Bu urushning qaynoq fazasini tugatishi mumkinmi? O‘ylaymanki, ha," - dedi Zelenskiy.
Uning so‘zlariga ko‘ra, Rossiya bilan energetika, shuningdek, Qora dengizdagi savdo kemalariga zarba berishdan voz kechish bo‘yicha kelishuvlar Moskva urushni tugatishga tayyorligidan dalolat berishi mumkin. Biroq, uning so‘zlariga ko‘ra, Rossiyaning muzokaralarga ochiqligi "birinchi navbatda AQShdagi saylovlarga bog‘liq."