Zelenskiy: Ukraina hududlari masalasini faqat Putin bilan muhokama qilaman

Vladimir Zelenskiy hududiy muomalalarni faqat Rossiya prezidenti bilan ikki tomonlama muhokama qilishini aytdi. AQSh va Yevropa bunday muzokaralardan chetda qolishi mumkin.

Ukraina prezidenti Vladimir Zelenskiy Vashingtonda Donald Tramp va Yevropa yetakchilari bilan o‘tkazilgan muzokaralardan so‘ng, Ukraina hududlari masalasini faqat Vladimir Putin bilan muhokama qilishini ma’lum qildi. «Bu masala faqat men bilan Putin o‘rtasida qoladi», — dedi u matbuot anjumanida.

Zelenskiyning ta’kidlashicha, u AQSh va NATO ittifoqchilariga jang maydonidagi vaziyatni ko‘rsatib, Rossiya tomonidan okkupasiya qilingan hududlarning tarixini va boshqaruvini muhokama qilgan. U o‘z nutqida «har bir foiz okkupasiya qilingan hudud uchun tortishgani»ni qayd etdi.

Muzokaralarda Rossiya rahbari ma’lum qismlar almashuvini taklif etgani haqida rasmiy izoh berilmagan. Biroq matbuotdagi ma’lumotlarga ko‘ra, Putin Donesk oblastining ayrim qismlarini Rossiyaga o‘tkazish, evaziga Sumi va Xarkiv oblastlaridagi okkupasiya qilingan hududlarni qaytarishni taklif qilgan bo‘lishi mumkin.

Zelenskiy Moskvadan birinchi navbatda ikki tomonlama, keyinchalik Tramp ishtirokida uch tomonlama uchrashuv tashkil etish taklifi tushganini ma’lum qildi. «Biz barcha formatlarga tayyormiz. Uchrashuv hech qanday shartsiz o‘tishi kerak», — dedi u.

Tramp esa Putin bilan 40 daqiqalik suhbat o‘tkazganini va sammit uchun tayyorgarlik boshlaganini e’lon qildi. Ammo Kreml rasmiysi Yuriy Ushakov Rossiya hozircha faqat delegasiya darajasini oshirish imkoniyatini ko‘rib chiqishga tayyorligini bildirdi.

Wall Street Journal ma’lumotlariga ko‘ra, Zelenskiy «muvozanatli hududiy almashinuv» imkoniyatini muhokama qilishga ochiqligini bildirgan. Yevropa yetakchilari esa Donbassni topshirishni AQShdan Floridani berishni so‘rashga tenglashtirib, Trampga buning murakkabligi va noqonuniyligi haqida tushuntirishga harakat qilgan.