Zelenskiy: "AQSh Ukraina qurolli kuchlarining Donbassdan chiqib ketishi evaziga xavfsizlik kafolatlarini taklif qildi"

Qo‘shma Shtatlar Rossiya bilan tinchlik shartnomasi doirasida Ukrainaga xavfsizlik kafolatlarini taqdim etdi, agar Kiyev Donbassni Moskvaga topshirsa.

Bu haqda Ukraina prezidenti Vladimir Zelenskiy Reuters agentligiga bergan intervyusida ma’lum qildi.

"Amerikaliklar Ukraina Donbassdan chiqib ketishga tayyor bo‘lishi bilanoq bu kafolatlarni yuqori darajada yakunlashga tayyor", dedi u.

Uning qo‘shimcha qilishicha, Yaqin Sharqdagi vaziyat Kiyevga bosim o‘tkazish orqali to‘rt yillik Rossiya-Ukraina urushini tezda tugatishga intilayotgan AQSh prezidenti Donald Trampning qarorlariga ta’sir qilmoqda: "Va menimcha, bu uning kelajakdagi qadamlariga ham ta’sir qiladi. Afsuski, mening fikrimcha, Prezident Tramp Ukraina tomoniga bosimni kuchaytirish strategiyasini tanlashda davom etmoqda."

Zelenskiy Donbassning sharqiy qismidan qo‘shinlarni olib chiqish Ukraina va Yevropaning kelajakdagi xavfsizligiga tahdid solishi haqida ogohlantirdi, chunki bu mintaqadagi kuchli mudofaa pozisiyalarini Rossiyaga topshirishni anglatadi.