Dunyoda aniqlangan koronavirus mutasiyalari bilan bog‘liq holda, Yaponiya hukumati chet elliklarning mamlakatga kirishini deyarli butunlay taqiqlashni rejalashtirmoqda, hattoki ishbilarmonlar uchun joriy etilgan migrasiya imtiyozlari ham bekor qilinishi mumkin.
Bu haqda “NHK” telekanali xabar berdi.
Zero, 28 dekabrdan yanvar oyining oxirigacha Yaponiya hukumati koronavirusning yangi turining aniqlanishi munosabati bilan dunyoning barcha mamlakatlari va mintaqalari fuqarolariga yangi vizalar berishni to‘xtatdi. Hozirda mamlakatga bu yerda doimiy yashovchi va uzoq muddatli vizalari bo‘lgan fuqarolar hamda chet elliklar tashrif buyurishlari mumkin, xolos.
Biroq, ma’lum qilinishicha, rasmiylar tegishli ikki tomonlama shartnomalar amal qilayotgan (Xitoy, Janubiy Koreya, Tailand, Vyetnam, Singapur, Malayziya va boshqalar) 11 mamlakat va mintaqalar ishbilarmonlari uchun joriy etilgan migrasiya imtiyozlari ta’sirini to‘xtatishga qaror qilishgan.
Yaponiyada pandemiya boshlanganidan beri koronavirus infeksiyasining 300 mingdan ortiq holatlari qayd etilgan.