Quyosh, shamol energiyasi va akkumulyatorlar narxini pasaytirish Yaponiya 2035 yilga borib o‘z energiyasining 90 foizini toza elektr energiyasidan olishini anglatadi. Bu haqda AQSh Milliy laboratoriyasi Lourens Berkli tadqiqotida aytildi, deya xabar berdi Reuters.
Hujjatga ko‘ra, ulushni 90 foizga oshirish 2020 yil darajasiga nisbatan elektr energiyasi xarajatlarini 6 foizga, energetika sohasida chiqindilarni 92 foizga kamaytirish imkonini beradi. Shuningdek, iqtisodiy, ekologik va energetika xavfsizligini ta’minlash uchun 2030 yildan keyingi davr uchun qayta tiklanuvchi energiya manbalarini (QTEM) joriy etish bo‘yicha aniq siyosat zarurligi qayd etilgan.
Tadqiqot shuni ko‘rsatadiki, qo‘shimcha batareyalar va mintaqalararo elektr uzatish liniyalariga ega bo‘lgan Yaponiya energiya tizimi ko‘mir yoki gaz bilan ishlaydigan elektr stansiyalarisiz ishonchli bo‘lib qolishi mumkin.
O‘tgan yili Yaponiya G7 yig‘ilishlarida iqlim o‘zgarishiga qarshi kurashish uchun 2035 yilgacha o‘z energetika sektorlarini ishlab chiqishga va’da bergan edi, ammo Tokio hali bu maqsad sari aniq yo‘lni belgilamadi.
Yaponiya 2030 yilga borib elektr energiyasi ishlab chiqarishda qayta tiklanuvchi energiya ulushini oshirish orqali issiqxona gazlari chiqindilarini 46 foizga kamaytirishni maqsad qilgan.
Yaponiya bugungi kunda o‘zining energetika sohasida qo‘llaniladigan deyarli barcha yoqilg‘ini import qiladi va bu mamlakatning energiya xavfsizligi uchun jiddiy xavf tug‘diradi. Quyosh, shamol, gidroenergetika, biomassa, vodorod va yadro manbalaridan olinadigan sof elektr energiyasi jami 24% ni tashkil qiladi.
Yaponiya hukumati 2035 yilgacha qayta tiklanadigan energiya va dengiz shamol energiyasi ulushini elektr energiyasi ishlab chiqarish tarkibida 70 foizgacha oshirishni kutmoqda. Shu bilan birga, atom va gaz energiyasining ulushi mos ravishda 20% va 10% ni tashkil qiladi. Mavjud ko‘mir elektr stantsiyalariga kelsak, ular bosqichma-bosqich to‘xtatiladi, deyiladi tadqiqotda.
