AQSh yadroviy zarba bergan taqdirda, Eron ham xuddi shunday javob berish bilan tahdid qildi.
«AQSh qanday qurol ishlatmasin, Eron ham shunday javob beradi», — dedi parlament milliy xavfsizlik komissiyasi a’zosi.
Agar AQSh Eronga qarshi yadroviy qurol ishlatsa, Eron ham xuddi shunday javob qaytaradi. Bu haqda Eron parlamentining Milliy xavfsizlik va tashqi siyosat komissiyasi a’zosi Fada Husayn Malekiy ma’lum qildi.
AQSh tomonidan yadroviy zarba berish ehtimoli haqidagi xabarlarga munosabat bildirgan Malekiy Amerika prezidenti Donald Tramp tomonidan «o‘ylanmagan harakatlar» sodir etilishi ehtimolini istisno qilmasligini, ammo bunday ssenariyni ehtimoli past deb hisoblashini aytdi.
«Menimcha, u bunday qadamni tashlashga jur’at qilmaydi, chunki bu dunyoni xavfli urushga g‘arq qilishi mumkin», — dedi deputat Eronning Khabar Online nashriga bergan intervyusida.
AQSh yadroviy zarba bergan taqdirda, Eron ham javoban yadroviy qurol ishlatadimi, degan to‘g‘ridan-to‘g‘ri savolga Malekiy: «AQSh qanday qurol ishlatmasin, Eron ham xuddi shunday javob beradi», — deb javob berdi.
Shu bilan birga, deputat Tehronda yadroviy qurol borligini ochiq aytmadi.
Malekiy Vashingtonni keyingi harbiy harakatlardan ham ogohlantirib, Eronning javob berish uchun «ko‘plab variantlari» borligini bildirdi.
«Eronning ko‘plab qurol turlari va harbiy imkoniyatlari hali namoyish etilmagan», — dedi u. Uning qo‘shimcha qilishicha, Tehron mudofaa strategiyasidan «faol va hujumkor tiyib turish» strategiyasiga o‘tgan.
Deputat, shuningdek, Trampni Eron va AQSh o‘rtasidagi memorandum bo‘yicha majburiyatlarni bajarmayotganlikda aybladi. Uning so‘zlariga ko‘ra, Vashington avval o‘z zimmasiga olgan majburiyatlarni bajarmaguncha, Tehron muzokaralarga qaytmaydi. Unga qadar Hurmuz bo‘g‘ozi atrofidagi kelishmovchiliklar ham hal etilmay qoladi.
Eron va AQSh Pokiston vositachiligida iyun oyi o‘rtasida o‘zaro anglashuv memorandumini imzolagan edi.
Hujjat harbiy harakatlarga barham berish va yakuniy kelishuv bo‘yicha muzokaralar uchun sharoit yaratishga qaratilgan edi. Biroq keyinchalik kelishuvlarni, jumladan, Hurmuz bo‘g‘ozi atrofidagi vaziyatni amalga oshirish masalasidagi kelishmovchiliklar tufayli muzokara jarayoni to‘xtab qoldi.
Jizzaxda bir sutkada 2 ta YTHda 5 kishi halok bo‘ldi
«Toliblar AQShni Afg‘onistondan chiqarib yuborgan edi, endi esa yana qaytishga chaqirmoqda» — The New York Times
Ijtimoiy tarmoqlarda ChatGPT yaratilishidan 10 yil oldin chop etilgan post topildi (foto)
