Xitoy Ukrainadagi vaziyatni tinch yo‘l bilan hal etish rejasini e’lon qildi

Xitoy Tashqi ishlar vazirligi Ukrainadagi vaziyatni tinch yo‘l bilan tartibga solish rejasini e’lon qildi, hujjat matni departament saytida mavjud, u 12 banddan iborat.

Muhim nuqtalar - tinchlik muzokaralarini qayta boshlash va harbiy harakatlarni to‘xtatish. Pekin tomonlarni barcha mamlakatlar suverenitetini hurmat qilishga, BMT Nizomini hurmat qilishga va Sovuq urush mentalitetidan voz kechishga chaqirdi.

«Muloqot va muzokaralar Ukraina inqirozining yagona samarali yechimidir. Inqirozni tinch yo‘l bilan hal qilishga hissa qo‘shadigan barcha sa’y-harakatlarni rag‘batlantirish va qo‘llab-quvvatlash kerak. Xalqaro hamjamiyat tinchlik muzokaralarini osonlashtirishi lozim», – deyiladi hujjatda.

Rejada gumanitar inqirozni bartaraf etish, tinch aholi va harbiy asirlar himoyasini ta’minlash, shu jumladan, almashish uchun qulay shart-sharoitlar yaratish taklif etiladi. Atom elektr stansiyalari xavfsizligini ta’minlash va yadroviy mojarolar hamda kimyoviy yoki biologik qurollardan foydalanish xavfini kamaytirish zarurligiga e’tibor qaratiladi.

Kelishuvning iqtisodiy masalalariga kelsak, Xitoy Qora dengiz kelishuvi bo‘yicha don eksportini osonlashtirish, bir tomonlama sanksiyalar va jahon iqtisodiyotidan siyosiy maqsadlarda foydalanishni to‘xtatish, ishlab chiqarish va yetkazib berish zanjirlarini tiklashni taklif qildi.

Yakuniy paragrafda Pekin mojaro tugaganidan keyin Ukrainani qayta tiklashga yordam berishga chaqirdi va yordam ko‘rsatishga hamda bu ishda konstruktiv rol o‘ynashga tayyorligini bildirdi.

22 fevral kuni Xitoyning BMTdagi vakili Chjan Jun Xitoyning Ukrainadagi vaziyatni tartibga solish bo‘yicha tinchlik rejasi yaqin vaqt ichida taqdim etilishiga va’da berdi. Shuningdek, u Xitoy Rossiya va Ukrainani o‘t ochishni to‘xtatishga va imkon qadar tezroq tinchlik muzokaralarini boshlashga chaqirayotganini aytdi.