Venesuela Trampning tahdidlariga javoban tankerlar uchun harbiy eskortlarni joriy qilmoqda

Venesuela hukumati AQSh prezidenti Donald Trampning tahdidlariga javoban tankerlar uchun dengiz eskortini joriy qildi.

Bu haqda The New York Times (NYT) nashri xabar berdi.

Qayd etilishicha, AQSh prezidenti Venesuela bilan biznes yurituvchi sanksiyalangan tankerlarni blokirovka qilishini e’lon qilganidan so‘ng, neft qo‘shimcha mahsulotlarni olib ketayotgan bir qancha kemalar dengiz kuchlari kuzatuvi ostida mamlakat sharqiy qirg‘oqlaridan jo‘nab ketgan.

Nashrning yozishicha, Xose portidan neft mahsulotlarini olib ketayotgan kemalar Osiyo bozorlariga yo‘l olgan. AQSh rasmiysining ta’kidlashicha, Oq uy eskort haqida bilib olgan va turli variantlarni ko‘rib chiqmoqda. Ushbu tankerlar AQSh sanksiyalariga duchor bo‘lgan kemalar ro‘yxatida bo‘lganmi yoki yo‘qligi noma’lum.

Eslatib o‘tamiz, avvalroq jurnalist Taker Karlson AQSh prezidenti Donald Tramp 17 dekabr, chorshanba kuni mahalliy vaqt bilan 21:00ga rejalashtirilgan Oval kabinetdagi nutqi chog‘ida Venesuelaga urush e’lon qilishini ma’lum qilgan edi.

Bungacha siyosatchi Venesueladan AQShga mulkini qaytarishni talab qilgan va respublika Janubiy Amerika tarixida yig‘ilgan eng katta armada bilan to‘liq o‘ralganligini ta’kidlagan.