“Vatanparvar”da texnik kasblar tayyorlovi bo‘yicha ilmiy-amaliy konferensiya o‘tkazildi

28 noyabr kuni “Vatanparvar” tashkiloti Markaziy kengashi tashabbusi bilan “Texnik kasb mutaxassislarini tayyorlash jarayoniga zamonaviy yondashuvlar va tendensiyalar” mavzusida ilmiy-amaliy konferensiya bo‘lib o‘tdi.

Tadbirning asosiy maqsadi — fuqarolarni mehnat bozorida talab yuqori bo‘lgan texnik yo‘nalishlarga o‘qitishda davlat va jamoat tashkilotlari bilan hamkorlikni yanada kuchaytirish hamda o‘quv jarayoni samaradorligini oshirishga qaratilgan qo‘shimcha chora-tadbirlarni belgilashdan iborat.

“Vatanparvar”ning 34 yilligi munosabati bilan tashkil etilgan konferensiyada Migrasiya agentligi, Yoshlar ishlari agentligi, IIV YHX xizmati, “GM O‘zbekiston”, “SAMIST AUTO”, “Swift Road Academy” kabi qator tashkilotlar vakillari ishtirok etdi. Ma’ruzachilar yoshlarni kasbga tayyorlash borasidagi ishlar haqida ma’lumot berib, hamkorlikni kengaytirishga oid takliflarni ilgari surdilar.

Tashkilot tizimida haydovchilar tayyorlash bilan birga mehnat bozorida talab yuqori bo‘lgan 10 ta qo‘shimcha kasb bo‘yicha o‘qitish mexanizmi yo‘lga qo‘yildi. Jumladan:

Texnik xizmat ko‘rsatish mutaxassislari: vulkanizator, gaz-elektr payvandchi, avtochilangar, avtoelektrik.

Murakkab texnikalar operatorlari: yuk ortuvchi transport, avtogidropod’yomnik, yuk mashinasi krani, g‘ildirakli traktor, bitta kovshli ekskavator.

Yoshlar va aholining ehtiyojmand qatlamlarini qo‘llab-quvvatlash maqsadida “Yoshlar daftari”, “Temir daftar”, “Ayollar daftari”dagi fuqarolarni texnik kasblarga imtiyozli o‘qitish yo‘lga qo‘yilgan.

Har yili 100–150 ming nafar fuqaro haydovchilikka o‘qitilmoqda.

O‘quv markazlarida:

2 000 dan ortiq o‘quv avtomobillariga GPS,

kirish joylariga Face-ID qurilmalari o‘rnatildi va tizimlar Yagona axborot bazasiga integrasiya qilindi.

2023 yil 396-son qaror asosida o‘quv avtomobillarini yangilash jarayoni yo‘lga qo‘yilib, 3 000 mashinaning 1 000 tasi zamonaviy rusumlarga almashtirildi. “GM O‘zbekiston” bilan hamkorlikda 500 dan ortiq “ONIX LS MT” va 8 ta “Tracker-2”, “SAMIST AUTO” bilan 100 dan ortiq “FOTON” rusumli yuk avtomobillari xarid qilindi.

Qoraqalpog‘iston va viloyatlarda jami 25 ta zamonaviy avtodrom barpo etildi. Yana 3 ta hududda qo‘shimcha avtodromlar qurilmoqda.

2023 yilda “Vatanparvar” va Migrasiya agentligi o‘rtasida Memorandum imzolanib, xorijiy mehnat bozori uchun texnik mutaxassislar tayyorlash yo‘lga qo‘yildi.

Bu doirada:

2024 yilda — 27 nafar,

2025 yilda — 85 nafar fuqaro “VS” va “SE” toifalari bo‘yicha tayyorlanib Germaniyaga ishga yuborildi.

Shuningdek, Latviya, Yaponiya, Janubiy Koreya, Italiya va Sloveniya delegasiyalari tashrif buyurib, o‘z talablariga mos haydovchilar tayyorlash bo‘yicha hamkorlikni yo‘lga qo‘ydi.

“SE” toifasi bo‘yicha:

26 nafar — Litva,

25 nafar — Chexiya,

31 nafar — Polsha,

30 nafar — Bolgariya

talablariga mos mutaxassislar tayyorlandi.

Fransiyaning “Pejo” avtomobil zavodi uchun 300 nafar yuk ortish transporti operatorlari tayyorlandi.

Sport yo‘nalishlari ham rivojlanmoqda

Tadbir doirasida avtokross, motokross, karting, duatlon va pnevmatik quroldan o‘q otish bo‘yicha tashkil etilgan texnik-amaliy sport to‘garaklari namoyish etildi.