O‘zbekistonga belgilangan me’yor talablariga nomuvofiq, sifati kafolatlanmagan mahsulotlarning kirib kelish holatlari mavjud. 2017-2018 yillar davrida jismoniy va yuridik shaxslardan “O‘zstandart” agentligiga 277 dan ortiq, Iste’molchilarning huquqlarini himoya qilish jamiyatlari federasiyasiga esa 3 mingdan ortiq mahsulot sifati ustidan shikoyat murojaatlari kelib tushdi, deb xabar qilmoqda “O‘zstandart” agentligi matbuot xizmati.
2018 yilda mahsulotlar muvofiqligini baholashda 52,5 mlrd. so‘m miqdordagi mahsulotlarning texnik reglamentlar talablariga va import mahsulot standartlarining majburiy talablariga nomuvofiqligi aniqlangan.
Joriy yilning o‘tgan davri mobaynida import mahsulotlari sinovlari jarayonida jami miqdori 2,9 mlrd. so‘m bo‘lgan 14 turdagi mahsulot bo‘yicha 20 holatlarda belgilangan normalarga nomuvofiqligi aniqlangan.
Ma’lumot uchun, Butun jahon sog‘liqni saqlash tashkiloti ma’lumotlariga ko‘ra, har yili rivojlangan mamlakatlarning deyarli 30% aholisi oziq-ovqatdan zaharlanish bilan bog‘liq kasalliklardan aziyat chekadi. AQShda har yili oziq-ovqat bilan bog‘liq 76 millionga yaqin kasallanish holatlari qayd etilgan. Ulardan 325 ming holatida shifoxonaga yotish va 5 ming holatda o‘limga olib kelgan.