O‘zbekistonliklar uchun Qatarda ishlash imkoniyati yaratildi

O‘zbekistonlik fuqarolar uchun Qatar davlatida mehnat faoliyatini amalga oshirish maqsadida yirik vakansiyalar bazasi ochildi.

Bu imkoniyat Tashqi mehnat migrasiyasi agentligi hamda Qatarning «Jusour» rekruting kompaniyasi o‘rtasida imzolangan o‘zaro hamkorlik kelishuvi doirasida taqdim etilmoqda.

Ushbu yangilik haqida agentlikning «Xorijda ish» rasmiy Telegram kanali orqali ma’lumot berildi.

Belgilangan tartibga ko‘ra, ishga qabul qilish uchun nomzodlarga aniq talablar qo‘yilgan bo‘lib, unga ko‘ra talabgorlar 18 yoshdan 45 yoshgacha bo‘lishi lozim.

Shuningdek, nomzodlardan ingliz tilini kamida A2 darajada bilishi yoki IELTS 5 natijasiga ega bo‘lishi talab etiladi. Arab tilini mukammal biladigan fuqarolarga esa saralash jarayonlarida qo‘shimcha ustunlik berilishi ko‘zda tutilgan.

Ishga joylashishning barcha jarayonlari maxsus «Tawzeef» platformasi orqali amalga oshiriladi.

Nomzodlar ushbu saytda e’lon qilingan turli yo‘nalishdagi vakansiyalar bilan tanishib chiqib, o‘zlariga mos keladigan lavozimlarga shaxsiy rezyume (CV) yuborishlari mumkin. Yuborilgan ma’lumotlar kompaniya vakillari tomonidan ko‘rib chiqilib, ma’qul kelgan nomzodlar bilan elektron pochta orqali aloqaga chiqiladi va ular suhbat jarayoniga taklif etiladi.

Saralashning barcha bosqichlaridan muvaffaqiyatli o‘tgan o‘zbekistonliklar Tashqi mehnat migrasiyasi agentligi bilan uch tomonlama shartnoma tuzadilar. Shundan so‘ng ular uchun Qatar davlatiga borish va ishlash uchun zarur bo‘lgan viza hujjatlari belgilangan tartibda rasmiylashtirib beriladi.