O‘zbekistonlik futbolchi Kambodja terma jamoasida o‘ynashga qaror qildi

O‘zbekistonlik markaziy yarim himoyachi Alisher Mirzayev mahalliy klublarda olti yildan ortiq faoliyat yuritganidan keyin Kambodja terma jamoasi safida o‘ynash huquqini qo‘lga kiritdi, deb xabar berdi Asean Football.

29 yoshli futbolchi Toshkentning «Paxtakor» jamoasi tarbiyalanuvchisi bo‘lib, 2019 yildan buyon Kambodjaning «Vishakxa» klubini sharaflab kelmoqda. Joriy mavsumda Mirzayev jamoa tarkibida 10 ta o‘yinda maydonga tushdi.

Futbolchi O‘zbekiston U-16 o‘smirlar terma jamoasi safida Osiyo chempioni bo‘lgan (2012 yil). Transfermarkt.com portali ma’lumotlariga ko‘ra, uning bozor qiymati 150 ming yevro deb baholanmoqda.