O‘zbekistondagi eng katta harbiy poligonda dala-o‘quv mashg‘uloti o‘tkazildi

Mudofaa vazirligiga qarashli “Kattaqo‘rg‘on” okrug dala-o‘quv maydonida Janubi-g‘arbiy maxsus harbiy okrug harbiy qismlarining reaktiv artilleriya batareyasi bilan jangovar otish bo‘yicha taktik o‘quvlari bo‘lib o‘tdi, deb xabar bermoqda Mudofaa vazirligi Axborot va ommaviy kommunikasiyalar departamenti.

Divizion komandirlari o‘quv rahbarligida mashg‘ulot o‘tash uchun yo‘l olgan harbiy texnikalarning kolonna bo‘lib harakatlanish chog‘ida zaharlangan va minalashtirilgan hududlardan o‘tish mashqlarida harbiy xizmatchilar yana bir karra toblanishdi.

122 mmli artilleriya gaubisasi, 152 mmli artilleriya pushkasi hamda 122 mmli reaktiv artilleriya qurollaridan jangovar o‘t ochish chog‘ida qo‘qqisdan dushman hujumi sodir etilganda uning oldini olish amaliyotlari ham harbiylarning jangovar shayligini oshirishda muhim omil bo‘ldi.

Mashg‘ulotlar jarayonida Vatan posbonlarining jangovar qurollar haqida puxta bilim va malakaga ega ekanliklari yaqqol isbotini topdi. Artilleriya qurollaridan belgilangan nishonlar aniqlik bilan yo‘q qilindi.