O‘zbekiston va Germaniya o‘rtasida mehnat migrasiyasi sohasida hamkorlik kengaytiriladi

Kambag‘allikni qisqartirish va bandlik vaziri Behzod Musayev boshchiligidagi O‘zbekiston delegasiyasi amaliy tashrif bilan Germaniyaga bordi, deb xabar bermoqda "Dunyo" AA muxbiri.

Tashrif davomida mamlakatimiz elchixonasida Germaniya iqtisodiyoti Sharqiy qo‘mitasi bilan hamkorlikda yirik nemis ish beruvchi kompaniya vakillari ishtirokida davra suhbati tashkil etildi.

Suhbatda vaqtincha xorijda ishlash istagida bo‘lgan hamyurtlarimizni Yevropaning rivojlangan davlatiga ishga jalb etish borasidagi hamkorlikni yanada kengaytirish, ushbu davlatga mehnat migrasiyasini tez va samarali tashkil etish masalalari muhokama qilindi.

Nemis ishbilarmonlari ayni paytda Germaniyada tashqi ishchi kuchiga bo‘lgan ehtiyoj ortib borayotganini, ayniqsa hamshiralik va feldsherlik, yuk mashinasi haydovchisi, sanoat, mexatronika, gastronomiya, yo‘l qurilishi sohalarida 130 mingdan ortiq ishchi kuchiga ehtiyoj mavjudligini bildirdilar.

Tadbir davomida mamlakatimizning ishchi kuchi borasidagi salohiyati, davlatimiz tomonidan xorijda kasbiy ta’lim olish va vaqtincha ishlash istagida bo‘lgan yurtdoshlarimizni qo‘llab-quvvatlash maqsadida yaratilgan shart-sharoitlar, imtiyoz va qulayliklar haqida taqdimot o‘tkazildi.

Uchrashuvda O‘zbekiston bilan ko‘p yillardan buyon mehnat migrasiyasi sohasida hamkorlik qilib kelayotgan kompaniyalar vakillari o‘z tajribalari bilan bo‘lishdilar va boshqalarni ham mamlakatimiz bilan hamkorlikka chorladilar. Shuningdek, muloqotda Germaniya mehnat bozori talablaridan kelib chiqqan holda yurtdoshlarimizning kasbiy tayyorgarligini oshirish, nemis tilini o‘rganish uchun shart-sharoitlar yaratish, viza olishda yengilliklar joriy etish bo‘yicha o‘z takliflarini bildirdilar. Kasb-hunarga o‘qitishning nemis modelini joriy etishga qaratilgan qo‘shma loyihalarni amalga oshirish tashabbusi ilgari surildi.

Nemis kompaniyalari vakillari O‘zbekiston bilan hamkorlikni kengaytirishga tayyorliklarini ta’kidladilar.

Vazir Behzod Musayev tashrif davomida Germaniya hukumatining migrasiya masalalari bo‘yicha maxsus komissari Yoaxim Shtamp bilan uchrashuv o‘tkazdi.

Muloqot davomida "Migrasiya va mobillik to‘g‘risida"gi hukumatlararo bitim loyihasi yakuniy matnini kelishish masalalari muhokama qilindi.

Ta’kidlash kerakki, hozirgi kunda Kambag‘allikni qisqartirish va bandlik vazirligi huzuridagi Tashqi mehnat migrasiyasi agentligi va Germaniyaning 25 ta kompaniyasi o‘rtasida O‘zbekiston fuqarolarini turli sohalarda vaqtincha ish bilan ta’minlash bo‘yicha shartnomalar tuzilgan. Yana beshta kompaniya bilan muzokaralar olib borilmoqda. So‘nggi uch yilda 821 nafar O‘zbekiston fuqarosi Germaniyaga vaqtinchalik ishlashga jo‘natilgan, 1 ming 670 nafar fuqaro mehnat faoliyatini ushbu mamlakatda davom ettirish uchun tayyorgarlikdan o‘tmoqda.

Shu tariqa, O‘zbekiston va Germaniya o‘rtasidagi mehnat migrasiyasi sohasidagi hamkorlik faol rivojlanib, vatandoshlarimizning bu mamlakatda ishlashlari uchun kasbiy tayyorgarlik va til o‘rganishlari ta’minlanib, ishga joylashishlari uchun qulay shart-sharoitlar yaratilmoqda.

"Simson Private Akademie" kasb-hunar ta’lim markazi ish boshqaruvchisi Maks Roymshyussel:

— Akademiyamiz turli kasblar, ya’ni chilangarlikdan tortib, mexanik, mexatronik yo‘nalishlarida dual kasbiy ta’lim asosida mutaxassislarni tayyorlaydi. 2021 yildan buyon O‘zbekiston bilan samarali hamkorlik qilib kelyapmiz. O‘zbekiston Kambag‘allikni qisqartirish va bandlik vazirligi hamda vazirlik huzuridagi Tashqi mehnat migrasiyasi agentligi bilan hamkorlik to‘g‘risida kelishuv imzolaganmiz.

Bugungi kunda O‘zbekistondan 50 dan ortiq yoshlar bizning ta’lim muassasalarimizda kasbiy kasb sirlarini egallamoqda. O‘zbekistonlik yoshlarning bilimga chanqoqligi va til o‘rganishga ishtiyoqlari juda yuqori. Biz bilan hamkorlik qiladigan nemis kompaniyalari o‘zbekistonlik mutaxassislardan juda mamnun.

"GP Günter Papenburg AG" kompaniyasi boshqaruv kengashi a’zosi Angela Pappenburg:

— O‘zbekiston elchixonasining Germaniya iqtisodiyotining Sharqiy Qo‘mitasi bilan hamkorlikda tashkil etilgan tadbirda ishtirok etganimdan juda mamnunman. Mazkur tadbirda O‘zbekiston kambag‘allikni qisqartirish va bandlik vazirining ishtiroki juda muhim bo‘ldi. Vazir bizning barcha savol va takliflarimizga o‘z fikrini bildirdi. Tashrif doirasida vazir bizning korxonamizga ham tashrif buyuradi va bizda kasbiy ta’lim bo‘yicha tahsil olayotgan o‘zbekistonlik yoshlar bilan uchrashadi.

Mehnat migrasiyasi ikki tomon uchun ham dolzarb masala hisoblanadi. Germaniyada ayni paytda ishchi kuchi yetishmovchiligi kuzatilmoqda. Nemis kompaniyalari kasbiy ta’lim olish va kelajakda ushbu kompaniyalarda ishlash istagida bo‘lgan yoshlarni izlamoqda. O‘zbekiston uchun ham bu amaliyot juda muhim ahamiyatga ega. Bu bir tomondan mamlakatda kasbiy ta’limni rivojlantirishga xizmat qilsa, ikkinchi tomondan Germaniyada ta’lim olgan yoshlar kelajakda o‘z yurtlariga xalqaro tajribaga ega mutaxassis sifatida qaytadilar. Ya’ni bu soha bo‘yicha hamkorlik ikki tomon uchun ham o‘zaro manfaatli hisoblanadi.

Biz Andijon shahridagi "Berlin Zentrum" o‘quv markazi bilan yaqin hamkorlik qilamiz. Ushbu markazni qo‘llab-quvvatladik, natijada ushbu markaz so‘nggi to‘rt yarim yil ichida jadal rivojlandi va juda katta yutuqlarga erishdi. Istiqboldagi rejalarimiz, mamlakatingizdagi kasbiy ta’lim muassasalarini yaqindan qo‘llab-quvvatlash, ustaxonalarni jihozlash va Germaniya mehnat bozori talablariga javob beradigan o‘quv rejalarini ishlab chiqishda yaqindan yordam berishdan iborat. Bunga erisha olsak, o‘zbekistonlik yoshlarini tayyor mutaxassis sifatida Germaniya korxonalariga ishga jalb eta olamiz.