O‘zbekiston milliy terma jamoasi Toshkentda Jahon chempionlariga qarshi o‘ynaydi

O‘zbekiston terma jamoasi noyabr oyida Urugvay terma jamoasiga qarshi o‘rtoqlik uchrashuvi o‘tkazadi. Bu haqda Championat.asia nashri xabar bermoqda.

Manbaga ko‘ra, Temur Kapadze jamoasi noyabrdagi FIFA kunlarida Urugvayga qarshi ikkita o‘rtoqlik uchrashuvi o‘tkazadi. 1930 va 1950 yillarda Jahon chempioni bo‘lgan Urugvayga qarshi bellashuvlardan biri Toshkentda bo‘lib o‘tishi rejalashtirilgan. Ikkinchi o‘yin esa Osiyo qit’asida o‘tkazilishi ko‘zda tutilmoqda.

Eslatib o‘tamiz, O‘zbekiston milliy jamoasi bungacha Urugvay bilan ikki bor o‘rtoqlik uchrashuvi o‘tkazgan va har ikkala o‘yinda ham 0:3 hisobida mag‘lub bo‘lgan. Birinchi uchrashuv 2018 yilda Montevideo shahrida, ikkinchisi esa 2019 yilda Xitoyda bo‘lib o‘tgan.