«O‘z uyini tark etish haqiqatan ham qiyin. Boshqa shaharga borish qo‘rquvi ba’zan o‘lim qo‘rquvidan ham kattaroq bo‘lishi mumkin»

Ukrainalik evakuasiya qilinganlar «bir oz uy hisini» saqlab qolishga harakat qilmoqda.

Pokrovsk va Mirnograd hozir Ukraina sharqidagi front chizig‘iga yaqinroq, shaharlar esa bo‘shab bormoqda.

«O‘z uyini tark etish haqiqatan ham qiyin. Boshqa shaharga borish qo‘rquvi ba’zan o‘lim qo‘rquvidan ham kattaroq bo‘lishi mumkin», deydi ukrainaliklarga yordam beradigan «Oq farishtalar» deb nomlangan maxsus polisiya bo‘linmasi bilan ishlaydigan Gennadiy Yudin.

Rossiya harbiylari Myrnogradga kundan-kunga yaqinlashmoqda va front chizig‘i hozir shahardan 10 kilometrdan kamroq uzoqlikda. Myrnograd muntazam ravishda otishma ostida va buning natijasida shahar aholisi 47 mingdan 2000 ga kamaygan , deydi mahalliy hokimiyat.

Oq farishtalar polisiya bo‘limi odamlarni zirhli mikroavtobusda shahar tashqarisiga olib chiqmoqda. Avtomobil ichida bolalar va kattalar uchun o‘q o‘tkazmaydigan jiletlar va barcha o‘lchamdagi dubulg‘alar mavjud.

«Hozir bu yerda deyarli birorta bola qolmagan», deydi Yudin. «Hali ham farzandli ikkita oila bor va ular [boshqa joydan] turar joy qidirmoqdalar, ular o‘zlari ketishadi».

Hukumat aholini tark etishga majbur qila olmaydi, deya tushuntiradi Yudin. Uning o‘zi tug‘ilib o‘sgan shahri Avdiivkani tark etishga majbur bo‘lgan, shuning uchun u odamlar uchun uylarini tashlab ketish qanchalik qiyinligini biladi.

«Avdiivkani yaxshi misol deb aytaman - endi u yerda na kasalxona, na tez yordam xizmati mavjud. Evakuasiyaga yordam beradigan hech kim yo‘q», - deydi Yudin. Shu tarzda u mahalliy aholini evakuasiya qilishga ko‘ndiradi.