Ukrainaning quruqlikdagi qo‘shinlari qo‘mondoni iste’foga chiqdi

Ukraina Qurolli kuchlari quruqlikdagi qo‘shinlari qo‘mondoni Mixaylo Drapatiy iste’foga chiqqani haqida hisobot taqdim etdi. Bu haqda u "Facebook"dagi sahifasida ma’lum qildi.

Bu qaror Ukraina Qurolli kuchlari o‘quv bo‘linmasi 12 askarning o‘limiga sabab bo‘lgan raketa zarbasidan keyin qabul qilingan.

"Ukraina Qurolli kuchlari quruqlikdagi qo‘shinlari qo‘mondoni lavozimidan iste’foga chiqqanim haqidagi hisobotni taqdim etishga qaror qildim. Bu askarlarimiz halok bo‘lishiga olib kelgan 239-o‘quv poligonidagi fojia uchun shaxsiy javobgarlik hissimdan kelib chiqqan ongli qadamdir", deb yozadi u.

Drapatiy qo‘mondon sifatida o‘z buyruqlarining bajarilishini to‘liq ta’minlay olmaganini ta’kidladi.

Rossiya qo‘shinlari Ukraina Qurolli kuchlari quruqlikdagi qo‘shinlarining o‘quv bo‘linmasiga raketa zarbasi berdi.

1 iyun kuni Rossiya qo‘shinlari Ukraina Qurolli kuchlari quruqlikdagi qo‘shinlari o‘quv bo‘linmalaridan birining joylashgan joyiga raketa zarbasi berdi. Bu haqda avvalroq Ukraina quruqlikdagi qo‘shinlari qo‘mondonligi "Telegram"da xabar bergan edi.

Kamida 12 kishi halok bo‘lgani va 60 dan ortiq kishi jarohat olgani ma’lum.