Uch yillik tanazzul. Germaniya tarixiy iqtisodiy inqiroz yoqasida turibdi

Germaniya Sanoat va Savdo Palatasi (DIHK) 23 000 ta kompaniya o‘rtasida o‘tkazilgan so‘rovga asoslangan yangi tadqiqotiga ko‘ra, Germaniya iqtisodiyoti ketma-ket uchinchi yil tanazzulga yuz tutishi mumkin. Tahlilchilar 2025-yilda mamlakat yalpi ichki mahsuloti yana 0,3 foizga qisqarishini kutishmoqda.Bu GFR tarixida misli ko‘rilmagan holat bo‘ladi.

"Biz hammamiz kutayotgan iqtisodiy tiklanish hali ko‘rinmaydi", dedi DIHK rahbari Elena Melnikova.

Asosiy zarbalardan biri AQSh bilan savdo mojarosining oqibatlari. Donald Tramp ma’muriyati tomonidan yangi tariflar joriy qilinganidan so‘ng, nemis kompaniyalarining 29 foizi eksport hajmining pasayishini kutmoqda va faqat 19 foizi o‘sishga umid qilmoqda.

Mamlakat ichida ham beqarorlik sezilmoqda. Tadbirkorlar sarmoyani qisqartirmoqda: faqat 19% ishlab chiqarishni kengaytirishga tayyor - bu antirekord. Korxonalarning atigi 13 foizi yangi ish o‘rinlari yaratishni, 22 foizi esa xodimlarni qisqartirishni rejalashtirmoqda. Respondentlarning deyarli yarmi (43%) allaqachon jiddiy moliyaviy qiyinchiliklarga duch kelmoqda.

Yangi koalisiyaning energiya narxlarini pasaytirish, davlat investisiyalarini oshirish va soliq imtiyozlari orqali biznes hayotini osonlashtirishga va’da berganiga qaramay, aksariyat kompaniyalar hali ham bosimni his qilishmoqda.

So‘rovda qatnashgan tadbirkorlarning 59 foizi davlatning iqtisodiy siyosatini o‘z biznesi uchun eng jiddiy tahdid sifatida tilga olib, yuqori xarajatlar va byurokratiyadan shikoyat qiladi.