Turkiya va Eron chegarasida bufer hudud tashkil etilishi mumkin

Erondagi migrasiyaning keng ko‘lamli to‘lqinidan xavotirlangan Turkiya hukumati sharqiy chegarasida bufer hudud tashkil etishi mumkin.

Mynet.com nashrining yozishicha, Turkiya AQShning Eronga ehtimoliy harbiy aralashuvi holatida kompleks choralar tayyorlamoqda, Anqaraning taxminicha, bu katta migrasiya to‘lqinini keltirib chiqarishi mumkin. Mamlakatning Tashqi ishlar vazirligi har qanday ssenariyga tayyor ekanini va hozirda "A, V va S rejalari" mavjudligini ma’lum qildi.

Xabar qilinishicha, Turkiya TIV vakillari Buyuk milliy majlisning Xalqaro ishlar bo‘yicha komissiyasi (Turkiya Respublikasi Parlamenti) a’zolarini Yaqin Sharqda, ayniqsa Eron va Suriyadagi hozirgi holat haqida xabardor qildi. Uchrashuv davomida Turkiyaning mintaqadagi mamlakatlar ishlariga tashqi aralashuvni qo‘llab-quvvatlamasligi va barqarorlikni saqlashni qo‘llab-quvvatlashi ta’kidlandi.

Turkiya matbuoti ma’lumotlariga ko‘ra, vazirlik Eronga qarshi ehtimoliy operasiya qochqinlarning ommaviy oqimiga olib kelishi mumkin deb hisoblaydi. Shu munosabat bilan Anqara ularning Turkiya hududiga o‘tishiga yo‘l qo‘ymaslik uchun chegaraning Eron tomonida bufer hudud tashkil etish g‘oyasini ko‘rib chiqmoqda.

Turkiya diplomatlari, shuningdek, Eron ichidagi vaziyat haqida ayrim ma’lumotlarni keltirdilar. Ularga ko‘ra, yaqinda bo‘lib o‘tgan noroziliklar davomida 4 mingdan ortiq kishi halok bo‘lgan va taxminan 20 ming kishi yaralangan. Bu raqamlar Turkiyaning vaziyatning yanada keskinlashishi va uning butun mintaqa uchun oqibatlari haqidagi xavotirini oshirmoqda.