Turizm – iqtisodiyot drayveri

Prognozlashtirish va makroiqtisodiy tadqiqotlar instituti (PMTI) mutaxassislari so‘nggi yillarda O‘zbekistonda turizm sohasida amalga oshirilgan islohotlar natijasini tahlil qildi.

Turizm mamlakatimiz iqtisodiyotining ertangi kuni. So‘nggi yillarda turizm milliy iqtisodiyotning "o‘sish nuqtalaridan" biriga aylandi. U turizmga aloqador boshqa tarmoqlarni rivojlantirish uchun drayver bo‘lib, yuqori multiplikativ ta’siri bilan daromadlarning ortishiga xizmat qiladi. Turizm O‘zbekiston sharoitida yangi ish o‘rinlarini tashkil etishda ham muhim omil hisoblanadi.

Turizmni rivojlantirishga qaratilgan sa’y-harakatlar tufayli uch yil ichida sayyohlar soni 2,5 baravar oshdi. Agar 2017 yilda ularning soni 2,7 million nafarni tashkil qilgan bo‘lsa, 2019 yilda 6,7 million nafarga yetdi. 2020 yilda pandemiya tufayli 1,5 million, 2021 yilda esa qariyb 1,9 million xorijiy sayyoh yuritimizga keldi. Turizm xizmatlari eksporti 2020 yilda 370 million AQSh dollarini tashkil etgan bo‘lsa, 2021 yilda ushbu ko‘rsatkich 15,1% oshib, 422,1 million AQSh dollariga yetdi. 2022 yilda jami 4,5 million sayyohning kelishi, buning hisobiga turizm xizmatlari eksporti sezilarli darajada ortishi kutilmoqda.

O‘zbekistonda turizm sohasining jadal tiklanishida ijobiy tendensiyalar kuzatilayapti. Ayni paytda mamlakat chet el sayohatlari uchun butunlay ochiq. O‘zbekistonga sayohat qilish istagida bo‘lganlar uchun barcha cheklovlar olib tashlandi. Pandemiyadan keyin ichki turizmni tiklash va aholining mamlakat bo‘ylab sayohat qilishini tizimli ravishda tashkil etishga alohida e’tibor qaratilmoqda.