Tramp: Ukrainaga Patriot ZRK yuboriladi, lekin xarajatlarni Yevropa Ittifoqi to‘laydi

AQSh prezidenti Donald Tramp Vashington Ukrainaga Patriot zenit-raketa tizimlarini yuborishini ma’lum qildi. Biroq uning ta’kidlashicha, bu yetkazib berish xarajatlarini Yevropa Ittifoqi qoplashi kerak.

«Biz hech narsa to‘lamaymiz, lekin jo‘natamiz», — dedi Tramp Merilend shtatidagi Djoynt-Beys-Endryus harbiy havo bazasida jurnalistlar bilan suhbatda.

Tramp aytishicha, ushbu qaror Ukrainaga himoya uchun kerak bo‘lgan yordam sifatida qabul qilingan. «Aniq miqdor hali belgilanmagan, lekin biz bir oz yuborishga qaror qildik. Ular o‘zlarini himoya qilishi kerak. Lekin to‘lovni Yevropa Ittifoqi amalga oshiradi», — dedi u.

Shuningdek, u Patriot tizimlari Ukraina uchun juda zarur ekanini ta’kidladi. «Bu ularga haqiqiy kerak bo‘lgan narsa», — dedi AQSh rahbari.

Tramp shuningdek, Rossiya prezidenti Vladimir Putinning harakatlaridan xafsalasi pir bo‘lganini bildirdi. «Men uning so‘zlarining ortida biror ma’no bor deb o‘ylagandim. U go‘zal so‘zlar aytadi, lekin kechasi odamlarni bombalaydi. Bu bizga yoqmaydi», — dedi u.

Rossiyaga nisbatan yangi sanksiyalar haqida so‘ralganda, Tramp «qaraymiz, nima bo‘lishini» deya javob berdi.

Gaza sektoridagi vaziyatga to‘xtalar ekan, Tramp AQSh muzokaralar olib borayotganini va kelasi haftada vaziyat aniqroq bo‘lishiga umid qildi.

U shuningdek, AQSh Markaziy banki (FRS) rahbari Jerom Pauellni tanqid qilib, uni mamlakat iqtisodiyoti uchun «zararli» deb atadi. «Agar u iste’fo bersa, ajoyib bo‘lardi. Bilaman, u bunday qilmaydi, lekin qilishi kerak», — dedi u.

Trampning fikricha, mamlakatda foiz stavkalari ancha past bo‘lishi kerak, ammo Pauell kerakli qarorlar bilan doim kechikadi.