Tramp ma’muriyati migrantlarni boshqa davlatlarga yana deportasiya qila oladi

AQSh Oliy sudi Donald Tramp ma’muriyatiga migrantlarni o‘z vatani bo‘lmagan uchinchi davlatlarga deportasiya qilish amaliyotini yana davom ettirish imkonini berdi.

29 sentyabr kuni qabul qilingan qaror bilan quyi sudning ushbu siyosatni to‘xtatib turgan hukmi vaqtincha kuchdan qoldirildi. Uch nafar liberal sudya bunga qarshi chiqqan, natijada qaror 6:3 nisbatda qabul qilingan.

Mazkur siyosat migrantlarni ularning fuqaroligiga mansub davlatdan boshqa mamlakatlarga yuborish imkonini beradi. Reuters ma’lumotiga ko‘ra, amaldagi tartibda deportasiya qilinayotgan shaxslarga oldindan yetarli ogohlantirish berish yoki o‘sha davlatda ta’qib va qiynoq xavfi mavjudligini bildirish uchun alohida imkoniyat yaratish talabi bekor qilingan.

Tramp ma’muriyati mazkur mexanizmni 2025 yilda joriy etgan edi. Hukumat bu chorani ayrim davlatlar o‘z fuqarolarini qabul qilishdan bosh tortgan holatlarda zarur vosita sifatida ko‘rsatmoqda. Tanqidchilar esa u migrantlarni xavfli mamlakatlarga yuborish ehtimolini oshirishini ta’kidlamoqda.

Sud hujjatlarida keltirilishicha, 2025–2026 yillarda kamida 25 ming kishi 28 dan ortiq uchinchi davlatga deportasiya qilingani haqida baholar mavjud.

Biroq Oliy sud 29 sentyabrda dasturning qonuniyligi bo‘yicha yakuniy qaror chiqarmadi. Sud ishni ko‘rib chiqishga qabul qildi va asosiy muhokamalarni 2026 yil dekabrida o‘tkazishni belgiladi. Unda uchinchi davlatlarga deportasiya siyosati AQSh qonunlari, prosessual huquqlar hamda qiynoqlarga qarshi xalqaro majburiyatlarga mos kelishi masalasi ko‘rib chiqiladi.