Tramp ma’muriyati Eron bilan tinchlik muzokaralari bo‘yicha dastlabki muhokamalarni boshladi

Tramp ma’muriyati Eron bilan tinchlik muzokaralari bo‘yicha dastlabki muhokamalarni boshladi. Bu haqda Axios xabar berdi.

Amerikalik rasmiylardan birining so‘zlariga ko‘ra, Qo‘shma Shtatlar Erondan oltita majburiyatni o‘z zimmasiga olishni talab qilmoqda, ular orasida uranni boyitish va yadro qurolini ishlab chiqishni butunlay to‘xtatish, raketa dasturini sezilarli darajada qisqartirish hamda “Hizbulloh” va Yamandagi husiylar kabi qurolli guruhlarni moliyalashtirishni to‘xtatish shartlari bor. Bundan tashqari, har qanday kelishuvga ko‘ra Ho‘rmuz bo‘g‘ozi ochilishi kerak bo‘ladi.

Axios ma’lumotlariga ko‘ra, so‘nggi kunlarda Vashington va Tehron o‘rtasida to‘g‘ridan to‘g‘ri aloqalar bo‘lmagan, biroq Misr va Qatar AQSh va Isroilni Eron muzokaralardan manfaatdor ekani, uning talablari o‘t ochishni to‘xtatish, kelgusida harbiy harakatlar tiklanmasligi uchun kafolat olish, shuningdek, tovon to‘lash masalalarini o‘z ichiga olishi haqida xabardor qilgan.

Nashr manbalarining aytishicha, Tramp ma’muriyati vakillari ikki savolga javob topishga harakat qilmoqda: Eronda kimlar bilan aloqa o‘rnatiladi va qaysi davlat vositachilik qilishi mumkin.

Oldingi muzokaralarda Eron manfaatlarini mamlakat tashqi ishlar vaziri Abbos Aroqchi ifodalagan, biroq Donald Trampning maslahatchilari uni qaror qabul qilishga vakolatli shaxsdan ko‘ra ko‘proq “ma’lumotlarni uzatish bo‘g‘ini” deb hisoblamoqda. Axios manbalariga ko‘ra, Oq uy hozirda Eronda qarorlarni aslida kimlar qabul qilishi va ular bilan qanday bog‘lanish mumkinligini aniqlashga harakat qilmoqda.