Tramp Grenlandiyaga qo‘shin yuborishi mumkinligini ma’lum qildi

Tramp ma’lum sharoitlarda Grenlandiyaga qo‘shin yuborishi mumkin.

AQSh prezidenti Donald Tramp NBC News telekanaliga bergan intervyusida ma’lum sharoitlarda Grenlandiyani egallash uchun Amerika qo‘shinlarini yuborishi mumkinligini aytdi.

"Bu sodir bo‘lishi mumkin. Sodir bo‘lishiga shubha qilaman, lekin albatta bo‘lishi mumkin," - deya javob berdi u tegishli savolga.

Davlat rahbari yana bir bor ta’kidladiki, AQSh Grenlandiyaga "juda muhtoj", chunki u xalqaro xavfsizlikni ta’minlash uchun zarur.

Donald Tramp prezidentlik lavozimiga kirishidan oldin ham bu orol Qo‘shma Shtatlar tarkibiga kirishi kerakligini bir necha bor ta’kidlagan edi. Uning aytishicha, bu hududlar milliy xavfsizlik va "erkin dunyo"ni, jumladan, Xitoy va Rossiyadan himoya qilish uchun strategik ahamiyatga ega. Oq uy rahbari orol ustidan nazorat o‘rnatish uchun harbiy kuch ishlatmaslikka va’da berishdan bosh tortdi.