Bugun, 30 sentyabr kuni Toshkent noqonuniy muomaladan olib qo‘yilgan 175 million so‘mlik jami 25 ming quti tamaki mahsulotlari yo‘q qilindi. Bojxona xodimlari huquq-tartibot idoralari xodimlari bilan birgalikda OAV vakillari guvohligida kontrabanda mahsulotlarini maxsus pechlarda yoqib yubordi.
Noqonuniy tamaki mahsulotlari xorijda ishlab chiqarilgan bo‘lib, raqamli markirovka kodlariga ega emas va aksiz markalari bilan qadoqlanmagan. Yoqib yuborilgan mahsulotlar Toshkent viloyati bojxona boshqarmasi tezkor tuzilmalari tomonidan DXX xodimlari bilan birga Ohangaronda o‘tkazilgan tezkor tadbirda ashyoviy dalil sifatida olingan. Ohangaron tuman sudi tomonidan ularni yo‘q qilish yuzasidan hukm o‘qilgan.
Ma’lumot uchun, joriy yilning 9 oyi davomida bojxonachilar tomonidan jami 17,8 milliard so‘mlik 1 million 458 ming 736 dona tamaki mahsulotlari olib qo‘yilgan. Huquqni muhofaza qilish organlari tomonidan esa aybdor shaxslarga nisbatan 60 dan ortiq jinoiy va 175 ta ma’muriy ish qo‘zg‘atilgan.