Sudan Rossiyaga qurol evaziga o‘z hududida harbiy baza joylashtirishni taklif qildi

Bu haqda The Wall Street Journal xabar bermoqda.

Sudanning harbiy hukumati Moskvaga 25 yillik hamkorlik kelishuvi tuzishni taklif qilgan, bu kelishuv Qizil dengiz bo‘yida rus harbiy bazasini tashkil etishni nazarda tutadi, deb xabar beradi gazeta.

Taklifga ko‘ra, Rossiya Sudan hududida 300 nafargacha harbiy xizmatchi va to‘rttagacha harbiy kemani, jumladan “atom” kemalarni joylashtirishi mumkin.

Bazani Port-Sudanda yoki hozircha nomi oshkor qilinmagan Qizil dengizdagi boshqa bir joyda tashkil etish taklif etilgan.

Bundan tashqari, Sudan hukumati Rossiyaga mamlakatdagi konchilik konsessiyalariga kirish imkonini ham bermoqda. Sudan Afrikada oltin qazib olish bo‘yicha 3-o‘rinda turadi.

Manbalarning aytishicha, buning evaziga Sudan Rossiyadan ilg‘or havo mudofaasi tizimlari va boshqa qurol-aslahalarni imtiyozli narxlarda olishni xohlamoqda.