Savdo urushi qizg‘in tus olmoqda: Xitoyning Amerikaga qarshi javob zarbasi

Bloomberg axborot agentligi xabardor manbalarga tayanib ma’lum qilishicha, Xitoy hukumati ikki mamlakat o‘rtasidagi davom etayotgan savdo-iqtisodiy mojaroda AQShga qarshi javob choralarini ko‘rdi.

Pekin bu harakatni AQSh prezidenti Donald Tramp ma’muriyati Xitoy mahsulotlariga 20 foizlik boj soliqlarini joriy etganidan so‘ng amalga oshirdi. Bunga javoban Xitoy o‘z kompaniyalarining Qo‘shma Shtatlar iqtisodiyotiga sarmoya kiritishini chekladi. Agentlik suhbatdoshlarining fikricha, bu qadam Vashington bilan bo‘lajak savdo muzokaralarida Pekinning mavqeyini mustahkamlaydi.

Eslatib o‘tamiz, 2025 yil mart oyida Xitoy Xalq Respublikasining Rivojlanish va islohotlar bo‘yicha milliy komissiyasi mamlakat rahbariyatidan Amerika bozoriga sarmoya kiritishni rejalashtirayotgan yangi korxonalarni ro‘yxatdan o‘tkazishni to‘xtatish to‘g‘risida ko‘rsatma olgan edi. So‘nggi ma’lumotlarga ko‘ra, 2023 yilda Xitoyning AQSh iqtisodiyotiga kiritgan sarmoyalari hajmi 6,9 milliard dollarga yetgan. Manbalar ushbu cheklovlar qancha muddat amal qilishini aniqlashtira olmadi, biroq Trampning Xitoyga nisbatan qat’iy savdo siyosati yumshatilsa, ularni bekor qilish mumkinligini taxmin qilishdi.

Bundan oldin, 2025 yil mart oyi boshida, Tramp Xitoy mahsulotlariga import bojlarini 10 foizdan 20 foizgacha oshirib, qat’iylashtirgan edi. AQSh prezidenti bu qarorni Xitoyda giyohvand moddalar ishlab chiqarilishiga qarshi kurash bilan izohladi, chunki ularning katta qismi hamon Amerika bozoriga kirib kelmoqda.