Saudi Aramco Ukrainadan dronlar sotib olyaptimi?

Saudiya Arabistonining neft kompaniyasi, dunyodagi eng yirik neft eksportchisi bo‘lgan Saudi Aramco, Ukraina ishlab chiqaruvchilari bilan to‘sib qoluvchi dronlar xaridi bo‘yicha muzokara olib borayotgani haqidagi Amerikaning The Wall Street Journal (WSJ) gazetasi xabarini rad etdi.

“Bu da’volar haqiqatga mos kelmaydi”, — deyiladi Saudi Aramco’ning 12 mart, payshanba kuni Reuters agentligi orqali e’lon qilingan bayonotida.

The Wall Street Journal o‘z manbalariga tayanib, Saudi Aramco o‘z konlarini Eron dronlaridan himoya qilish maqsadida to‘sib qoluvchi dronlar ishlab chiqaradigan Ukrainaning SkyFall va Wild Hornets kompaniyalari mahsulotlarini sotib olish imkoniyatini muhokama qilayotganini xabar qilgan edi. Bu apparatlar dushman dronlarini ularga borib urilish yoki yaqinida portlash orqali yo‘q qila oladi.

O‘z navbatida, Sting to‘sib qoluvchi dronlarini ishlab chiqaradigan Wild Hornets kompaniyasi o‘z mahsulotlarini na Fors ko‘rfazi davlatlari hukumatlariga, na mahalliy kompaniyalarga sotish bo‘yicha muzokara olib bormayotganini ma’lum qildi. Shu bilan birga, kompaniya Yaqin Sharq mamlakatlari va Yevropa Ittifoqidan o‘z dronlarini ehtimoliy eksport qilish haqida muntazam so‘rovlar kelib tushayotganini tasdiqladi.

“Hozirda bizning sa’y-harakatlarimiz Ukraina qurolli kuchlari, Milliy gvardiya, Ukraina Xavfsizlik xizmati va Bosh razvedka boshqarmasi bilan hamkorlikka qaratilgan”, — deb ta’kidladi ishlab chiqaruvchi.

Ukraina ishlanmalariga bo‘lgan qiziqish Fors ko‘rfazi energetika infratuzilmasiga qarshi Eron tomonidan uyushtirilgan bir qator hujumlardan keyin keskin kuchaydi.

Kiyev Yaqin Sharq mamlakatlari bilan harbiy-texnik hamkorlikni allaqachon faollashtirgan.

Zelenskiyning aytishicha, hamkorlik masalasida Ukrainaga rasman murojaat qilgan davlatlar soni allaqachon 11 taga yetgan. Ular orasida Eron bilan chegaradosh mamlakatlar, bir qator Yevropa davlatlari va AQSh ham bor.